Phenchhanda qazaq sportshysy Qytaı quramasy sapynda óner kórsetti

ASTANA.QazAqparat - Qytaı quramasy sapyndaǵy 22 jastaǵy qazaq sportshysy Arshynǵazy Shákenuly Ońtústik Koreıanyń Phenchhan qalasynda ótip jatqan XXIII qysqy Olımpıada oıyndarynda óner kórsetti, dep habarlaıdy QazAqparat.

Arshynǵazy Shákenuly baıraqty básekede erler arasyndaǵy 1500 metrge konkımen júgirý synynda óner kórsetti. Qortyndysynda, qandasymyz atalmysh qashyqtyqty 1:50.16 ýaqytta baǵyndyryp, 35 sportshy arasynan 32-oryndy qanaǵat etti.

Arshynǵazy qytaılyq BAQ-qa bergen suhbatynda jarysta óziniń qobaljýǵa boı aldyrǵanyn jasyrmady.

«Beıjińdegi básekede 1 mınýt 50.74 sekýnd nátıjesin kórsetken edim, búgin sol nátıjeni jańaladym. Árıne, Olımpıada oıyndaryna alǵash qatysyp otyrǵandyqtan tolqý jáne qobaljý sezimi boldy. Endigi maqsat alda taǵy bolatyn básekelerge daıyn bolý» -,dedi qandasymyz.
 

Buǵan deıin habarlaǵanymyzdaı, Arshynǵazy Shákenuly Qytaıdyń Shyńjań-Uıǵyr avtonomııalyq ólkesinde qazaq otbasynda dúnıege kelgen. Ol Shyńjańnyń konkımen júgirý quramasyna 2010 jyly qosylyp, 1500 metrge júgirýde Qytaıdyń ishki birinshiliginiń jeńimpazy atanǵan.

Aıta keteıik, Arshynǵazy 24 aqpan kúni Phenchhan Olımpıadasynda konkımen júgirýden erler arasyndaǵy jappaı-start básekesinde óner kórsetedi.