Phenchhanda erteń «Olımpıadaǵa qosh keldińizder!» atty resmı shara ótedi

ASTANA. QazAqparat - Ońtústik Koreıanyń Phenchhan qalasy 1-shi aqpan kúni olımpıadashylarǵa «Olımpıadaǵa qosh keldińizder!» atty resmı shara ótkizedi, dep habarlaıdy QazAqparat tilshisi.

Bul týraly atalǵan eldiń Olımpıada oıyndaryn uıymdastyrý komıteti málimdedi. Atalǵan aqparatta «Olımpıada qalashyǵyna qosh keldińizder! atty arnaıy is shara 1-shi aqpan, ıaǵnı beısenbi kúni jergilikti ýaqyt boıynsha saǵat 14:00-de bastalady», - dep kórsetilgen.

Osyǵan deıin habarlaǵanymyzdaı, qazaqstandyq sportshylardyń alǵashqy legi Phenchhanǵa 1-shi aqpan kúni baryp ornalasa bastaıdy. Al sońy 7-shi aqpanǵa deıin jetip bolýy tıis. Bul kúni Olımpıada qalashyǵynda qazaqtyń kók baıraǵy kóteriledi.

Esterińizge sala keteıik, Qazaqstan quramasy Olımpıadaǵa 57 joldama jeńip alǵan bolatyn. Otandastarymyz sporttyń 9 túrinen synǵa túsedi. Olımpıada oıyndary aqpannyń 9-25 aralyǵynda ótedi.