Phenchhan Olımpıadasyna 50-ge jýyq joldama alýdy josparlaýdamyz - Musaıbekov

ASTANA. QazAqparat - Qazaqstan Phenchhanda ótetin HHІІІ Qysqy Olımpıada oıyndaryna 50-ge jýyq joldama alýdy josparlaýda. Bul týraly búgin Úkimet úıinde ótken baspasóz máslıhatynda QR Mádenıet jáne sport vıtse-mınıstri Sáken Musaıbekov aıtty, dep habarlaıdy QazAqparat.

«Ózderińiz de bilesizder, 2 aıdan keıin Ońtústik Koreıanyń Phenchhan qalasynda HHІІІ Qysqy Olımpıada oıyndary bastalady. Oǵan 80-nen astam elden 2 500-ge jýyq sportshy qatysady. 15 sport túri boıynsha 102 medal sarapqa salynady. Qazaqstan 9 sport túrinen Olımpıadaǵa qatysady dep oılaımyz. Bizdiń qurama komandanyń qorjynynda 23 joldama bar»,- dedi ol.

Vıtse-mınıstrdiń dereginshe, atalǵan joldamalardyń 10-y bıatlonnyń, 10-y short-trektiń, al 3-eýi mánerlep syrǵanaý sportynyń enshisinde. Al qalǵan qurama komandalar qazirgi ýaqytta shetelde jarystarǵa qatysyp, joldamalardy utyp alý jolynda júr.

«Biz sportshylarymyzǵa qatty senemiz. 50-ge jýyq joldama alýdy josparlap otyrmyz. Taǵy da bir aıta ketetin jaıt, Olımpıada týraly jedel habar berý úshin jýrnalısterge Rıodaǵy tájirıbe qoldanylady. Biz Ońtústik Koreıada, Phenchhanda baspasóz ortalyǵyn ashamyz. Jalpy, sportshylarymyzǵa senimimiz mol. Olarǵa tek qana sáttilik pen jeńis tileımiz»,- dedi Sáken Musaıbekov.