Phenchhan: Qazaqstandyq sportshylardyń jarystyń 5-shi kúnindegi nátıjeleri
Búgin, ıaǵnı Olımpıada oıyndarynyń besinshi kúni qazaqstandyq sportshylar sporttyń 4 túrinen baq synady. Alaıda birde-bir sportshymyz júldege ilige alǵan joq.
Aıtalyq, búgin shańǵyshy Alekseı Poltoranınniń jolyna úmitpen qaradyq. Alaıda ol klassıkalyq sprınt saıysynyń shırek fınalynda tórtinshi orynǵa taban tiredi. Fınalǵa birinshi jáne ekinshi oryndarǵa qol jetkizgen sportshylar shyǵatyn bolǵandyqtan, bul kórsetkish Poltoranınniń fınalǵa shyǵýyna jetkiliksiz boldy. Sondaı-aq, osy sport túrinen áıelder arasynda Anna Shevchenko el namysyn qorǵap, ol da shırek fınaldan ary asa alǵan joq. Ol klassıkalyq sprınttiń alǵashqy irikteý synynan súrinbeı ótken bolatyn. Ókinishke qaraı, shırek fınalda 6-shy orynǵa qol jetkizgen sportshymyz jartylaı fınalǵa jete almady.
Al búgin taý shańǵy sportynan saıysqa túsken qazaqstandyq Igor Zakýrdaev jarysty 31-shi orynda aıaqtasa, short-trekten 1000 metr qashyqtyqta synǵa túsken Nurbergen Jumaǵazıev irikteý kezeńinen súrindi. Ol óz tobynda tórtinshi oryn aldy.
Sondaı-aq, búgin qazaqstandyq shorttrekshiler erler arasyndaǵy estafeta saıysynda óner kórsetti. Onda Denıs Nıkısha, Nurbergen Jumaǵazıev, Abzal Ájiǵálıev pen Erkebulan Shamuhanov bastaǵan qurama 5000 metr qashyqtyqqa saıysta óz tobynda úshinshi oryn alyp, fınalǵa shyǵa almady. Estafetada Qazaqstan quramasy Kanada men Qytaı komandalarynan jeńilip qaldy.
Búgin sońǵy jarysty qazaqstandyq sportshylardan konkıshiler aıaqtady. Atalǵan sport túrinen Fedor Mezentsev pen Denıs Kýzın 1500 metr qashyqtyqqa saıysqa túsken bolatyn. Ókinishke qaraı, qazaqstandyqtar úzdik jıyrma sportshynyń qataryna iline almady. Mezentsev saıysty 28-shi, al Kýzın 30-shy bolyp aıaqtady.