Phenchhan-2018: Sportshylar týystarymen sóılesýi úshin 30 mln teńge bólindi

ASTANA. QazAqparat - Phenchhan qalasynda ótetin XXIII qysqy Olımpıada oıyndaryna baratyn sportshylar týystarymen uıaly baılanysqa shyǵýy úshin 30 mln teńge bólindi. Bul týraly búgin Úkimettiń selektorlyq rejımdegi otyrysynan keıin BAQ ókilderiniń saýalyna jaýap bergen Ulttyq Olımpıada komıtetiniń bas hatshysy Danııar Ábilǵazın aıtty, dep habarlaıdy QazAqparat tilshisi.

«Sportshylarǵa jeke qoldaý uıymdastyrmaımyz. Degenmen, Ulttyq Olımpıada komıteti tarapynan sportshylarǵa qosymsha is-sapar shyǵynynyna qarjy bólindi. Bul olardyń uıaly baılanysty paıdalanyp, erkin sóılesýleri úshin jasaldy. Oǵan  demeýshilerdiń esebinen shamamen 30 mln teńge bólindi», - dedi ol.

Onyń aıtýynsha, Olımpıadaǵa baratyn qazaqstandyq delegatsııalar eki adamdyq nómirge ornalasatyn bolady. Sonymen qatar ol Olımpıadaǵa resmı delegatsııa qatarynda Úkimet múshelerinen kimderdiń baratyndyǵyn da aıtty.

«Bizde Mamın (Asqar Mamın - QR Premer-Mınıstriniń birinshi orynbasary - avt.) Ulttyq Olımpıada komıtetiniń  vıtse-prezıdenti, Qysqy Olımpıada túrlerine jaýap beredi. Eger onyń jumys kestesinde múmkinshilik bolyp jatsa, onda baryp qalar. Munan basqa Mádenıet jáne sport mınıstri men vıtse-mınıstr, Ulttyq Olımpıada komıtetiniń prezıdenti barady», - dedi Ábilǵazın.

Bas hatshynyń sózine qaraǵanda, Olımpıadaǵy Qazaqstan tarabynan 46 sportshy, 30 jattyqtyrýshy, keshendi-ǵylymı toptyń 10 mamany barady. Jalpy delegatsııa quramynda 138 adam bar, onyń 15-i - jýrnalıster. Danııar Ábilǵazın sportshylarymyzdyń dopıng qoldanýyna jol bermeý baǵytynda da naqty jmuystardyń júrgizilgendigin aıtty.

«Ulttyq Olımpıada komıteti Mádenıet jáne sport mınıstrligimen birlesip, dopıng paıdalaný faktilerine jol bermeý sharalaryn qabyldady. Bizdiń olımpıadalyq komandanyń barlyq áleýetti kandıdattary birneshe márte dopıng synaǵynan ótti. Árbir sportshydan sońǵy synama osy jyldyń qańtar aıynyń basynda alynyp, Drezdendegi dopıngke qarsy komıtetke jiberildi», - dedi komıtettiń bas hatshysy.