Phenchhan-2018: Qazaqstan sportshylarynyń dopıng synamasy Drezdenge jiberildi

ASTANA. QazAqparat - Phenchhan qalasynda ótetin XXIII qysqy Olımpıada oıyndaryna baratyn sportshylardyń dopıng synamasy Germanııaǵa jiberildi. Bul týraly búgin Úkimettiń selektorlyq rejimdegi otyrysynda Ulttyq Olımpıada komıtetiniń bas hatshysy Danııar Ábilǵazın aıtty, dep habarlaıdy QazAqparat tilshisi.

«Ulttyq Olımpıada komıteti Mádenıet jáne sport mınıstrligimen birlesip, dopıng paıdalaný faktilerine jol bermeý sharalaryn qabyldady. Bizdiń olımpıadalyq komandanyń barlyq áleýetti kandıdattary birneshe márte dopıng synaǵynan ótti. Árbir sportshydan sońǵy synama osy jyldyń qańtar aıynyń basynda alynyp, Drezdendegi dopıngke qarsy komıtetke jiberildi. ıAǵnı, Olımpıadaǵa tek qana taza sportshylar barady dep úmit artamyz. Menińshe, bul negizgi máselelerdiń biri», - dedi komıtettiń bas hatshysy.

Úkimet otyrysynan keıin de BAQ ókilderiniń saýaldaryna jaýap bergen Danııar Ábilǵazın «las» sportshylardyń aldaǵy baıraqty básekege qatysýyna jol bermýge baǵyttalǵan barlyq sharalardyń júzege asyrylǵandyǵyn basa aıtty.

«Sondyqtan da biz sportshylarymyzdyń 99,9 paıyzǵa dopıngten taza baratyndyǵyna senimdimiz», - dedi ol.

Aıta keterligi, Danııar Ábilǵazın sportshylarymyz týystarymen uıaly baılanysqa shyǵýy úshin demeýshiler esebinen 30 mln teńge qosymsha bólingendigin aıtqan edi.

Al Úkimet otyrysy barysynda QR Premer-Mınıstri Baqytjan Saǵyntaev qysqy Olımpıada oıyndaryna qatysatyn sportshylarymyzǵa sáttilik tiledi.