Pfizer jáne Roshe kompanııalary Qazaqstanda dári-dármek óndiredi
«Medıtsınalyq kómektiń sapasy men qoljetimdiligi máseleleri erekshe baqylaýda. Nevrologııalyq aýrýlary bar balalardy ońaltýdy qamtamasyz etý máselesi sheshildi. Búgingi tańda 55 medıtsınalyq uıym osyndaı qyzmet túrlerin kórsetedi. Onyń 27-si sońǵy 2 jylda ashylǵan. Salany bilikti kadrlarmen qamtamasyz etý úshin rezıdentýrada mamandar daıarlaýǵa memlekettik tapsyrys 70%-ke ulǵaıdy. Ol bıylǵy jyly 1000 grantqa kóbeıdi. Sońǵy 3 jylda medıtsına qyzmetkerleriniń jalaqysyn kóterýge respýblıkalyq bıýdjetten 805 mlrd teńge bólindi», - dep atap ótti Úkimet basshysy.
Onyń aıtýynsha, bıyl «Aýyldyq densaýlyq saqtaýdy jańǵyrtý» ulttyq jobasyn iske asyrý bastalǵan.
Ulttyq joba aıasynda 655 bastapqy densaýlyq saqtaý nysany salynyp, 32 aýdanaralyq aýrýhana jańǵyrtylady.
Bul 4 mln-nan astam aýyl turǵyndaryn mamandandyrylǵan medıtsınalyq kómekpen qamtýǵa múmkindik beredi.
Memlekettik-jekeshelik áriptestik tetigin paıdalana otyryp, josparlanǵan 8 oblystyq kópsalaly jáne ýnıversıtettik klınıkanyń 2-ýiniń qurylysy bastaldy.
BIGPHARMA TOP-50 qataryna kiretin iri álemdik farmındýstrııamen yntymaqtastyqty nyǵaıtý otandyq óndiristi damytýǵa qýatty serpin berdi.
«Mysaly, «Pfizer» jáne «Roshe» kompanııalarymen Qazaqstanda preparattar óndirisin ashý boıynsha kelisimderge qol qoıyldy. Memlekettik qoldaý sheńberinde qazirgi ýaqytta 36 otandyq taýar óndirýshilermen dárilik zattar men medıtsınalyq buıymdardy jetkizý boıynsha 98 uzaq merzimdi kelisimshart bar. Aǵymdaǵy jyly satyp alynǵan 1,6 myń dárilik zattyń 947 pozıtsııasyn nemese 61%-in otandyq farmatsevtıkalyq kompanııalar óndirdi», - dep túıindedi Álıhan Smaıylov.