Pfizer vaktsınasyn salý boıynsha ádistemelik usynymdar jarııalandy

NUR-SULTAN. QazAqparat – QR Bas memlekettik sanıtarııalyq dárigeri Erlan Qııasov «Qazaqstan Respýblıkasynyń halqy arasynda koronavırýs ınfektsııasy aýrýynyń aldyn alý jónindegi sharalardy odan ári júrgizý týraly» № 46 qaýlysyna ózgerister men tolyqtyrýlar engizdi, dep habarlaıdy QazAqparat tilshisi.

Atalǵan ózgertýlerge sáıkes, «Komırnatı» (Pfizer, AQSh) vaktsınasymen ekpe júrgizýge qatysty ádistemelik usynymdar daıyndaldy. Atap aıtqanda, bul vaktsınamen KVI-ge qarsy vaktsınatsııalaýǵa 12 jastan 18 jasqa deıingi jasóspirimder; júkti áıelder (júktiliktiń 16 aptasynan bastap 37 aptasyna deıin); laktatsııa kezeńindegi áıelder (bosanǵannan keıingi kezeń aıaqtalǵannan keıin (42 kúnnen keıin) bala 2 jasqa tolǵanǵa deıin) jatady. Sonymen qatar 12-den 18 jasqa deıingi sheteldik jasóspirimder, onyń ishinde QR aýmaǵynda úzdiksiz 3 jáne odan da kóp aı oqıtyn jáne turatyn stýdentter de KVI-ge qarsy vaktsınatsııalanady.

Egý pýnkti jasóspirimderdiń shoǵyrlanýyn boldyrmaıtyn egiletin adamdardyń turaqty bir jaqty aǵymyn qamtamasyz ete otyryp uıymdastyrylady. Egý kabınetinde egiletin adamdardyń jáne medıtsınalyq baqylaýdaǵy adamdardyń jınalýyna jol berilmeıdi. Bir mezgilde vaktsınatsııalaýǵa 3 adamnan asyrmaı shaqyra otyryp, egý kabınetiniń aldynda halyqtyń kóp jınalýyn boldyrmaı jeke vaktsınatsııa júrgizý uıymdastyrylady. Jalpy qarsy kórsetilimderden basqa, júkti áıelderge allergııalyq reaktsııalar, jedel qyzba jaǵdaılary kezinde, sondaı-aq júktiliktiń aýyr asqynýlary – eklampsııa, qan ketý jáne basqa da jaǵdaılar kezinde vaktsınatsııa júrgizilmeıdi.

Eger júkti áıel júktiliktiń 35-37 aptasynda KVI-ge qarsy vaktsınatsııanyń birinshi dozasyn alsa, onda vaktsınanyń ekinshi dozasy bosanǵannan keıin 42 kúnnen keıin engiziledi. Eki egýdiń arasyndaǵy usynylatyn aralyq 12 aptadan aspaıdy.

Eger eki dozada abaısyzda KVI-ge qarsy vaktsınalardyń ártúrli tıpteri engizilse, onda paıdalanylǵan vaktsınalardyń kez kelgenine qosymsha dozalardy engizý usynylmaıdy.

«Komırnatı» vaktsınasyn (Pfizer, AQSh) qoldana otyryp, KVI-ge qarsy vaktsınatsııany jáne revaktsınatsııany alý týraly derekter KVI-ge qarsy vaktsınanyń barlyq alynǵan dozalaryn ret-retimen (egý júrgizilgen kún, vaktsınanyń ataýy, serııasy, óndirýshi el, doza) kórsete otyryp, «Vaktsınatsııa» Modýliniń aqparattyq júıesinde kórsetiledi.