Petropavlǵa «Jıdebaı -Bórili» qoryq-mýzeıiniń kóshpeli kórmesi keldi
«Adamzattyń Abaıy» dep atalǵan kóshpeli kórme byltyr elimizdiń birqatar óńirlerin aralady. Qazaqtyń uly aqyny, oıshyl, sazger, aýdarmashy Abaı Qunanbaıulynyń 175 jyldyq mereıtoıyna oraılastyrylǵan bul is-sharany keıin pandemııaǵa baılanysty toqtatýǵa týra keldi. Endi epıdemıologııalyq jaǵdaı birshama jaqsarǵandyqtan Semeı qalasyndaǵy Abaıdyń «Jıdebaı-Bórili» memlekettik tarıhı-mádenı jáne ádebı-memorıaldyq qoryq-mýzeıiniń kóshpeli kórmesi Petropavlǵa kelip otyr. Ol «Abylaıhan rezıdentsııasy» mýzeı-kesheninde bir aı jumys istemek.
«Abaıdyń «Jıdebaı-Bórili» memlekettik qoryq-mýzeıi 175 jyldyq mereıtoıyna oraı tolyqtaı jańartylyp, zamanaýı tehnologııamen jabdyqtalyp, múldem basqa keıipke endi. Qazirgi tańda álemdegi mýzeılermen teń dárejege jetti desek, artyq aıtpaımyz. Mýzeı qorynda 22 myńǵa jýyq eksponat bar. Onyń ishinde Abaıdyń naqty óziniń qolynyń taby qalǵan, ózi ustaǵan eń qundy jádigerler bar. Sondaı jádigerlerdi ózimizben ala keldik», - deıdi mýzeıdiń ǵylymı qyzmetkeri Araı Jaqypova.
Kórmege qoıylǵan qundy zattardyń biri - aqynnyń shaı ishken qursaýlanǵan kesesi. Kórermen nazaryna sondaı-aq, Abaı ustaǵan kese qaby jáne ertoqymy, Áıgerimniń qobdıshasy usynylǵan.
«1883 jyly Semeıde ólketaný mýzeıi ashylady. Sol mýzeıge 1885 jyly Abaı ózi dosy Dolgopolov arqyly birqatar turmystyq zattardy syıǵa tartady. Keıin 1940 jyly Abaı mýzeıi ashylyp, 1961 jyly sol zattardyń birazy ólketaný mýzeıinen Abaı mýzeıine beriledi. Petropavlǵa qundy degen 20 shaqty jádigerdi ákeldik», - deıdi Araı Jaqypova.