Petropavldyń temirjol vokzalynda lıfti men eskalator paıda bolady

PETROPAVL. QazAqparat - Soltústik Qazaqstan oblysynyń ákimi Qumar Aqsaqalov Petropavldyń qurylys alańdaryn aralap qaıtty, dep habarlaıdy QazAqparat tilshisi.

Óńir basshysy baspasóz qyzmetiniń málimetinshe, Q. Aqsaqalov oblys ortalyǵyndaǵy kóshelerdiń qurylysy men abattandyrylý qarqynyn baǵalaǵan.

Petropavlda bıyl temirjol vokzaly qaıta salyna bastady. Ǵımarattyń aldyn jóndeý jumystary aıaqtalǵan. Jańadan lıftiler men eskalatorlar ornatý josparda bar. Qurylys jumystarynyń alǵashqy kezeńi 10 qazanda aıaqtalady. Vokzaldyń jóndeý jumystaryn 2019 jylǵa qaraı tolyq aıaqtaý josparlanǵan.

Sondaı-aq, qalaǵa kiretin joldar jóndelýde. Pestroe kóli jaǵynan ótetin jol qaıtadan salynyp jatyr. Merdiger uıym ókiliniń aıtýynsha, jańa jol tósemi 15-20 qyrkúıekke qaraı daıyn bolady.

«Kireberisti abattandyrýǵa asa qatty kóńil bólý kerek. Kópir jaqsy, barlyq zamanaýı talaptarǵa jaýap beredi. Jaıaý júrginshiler aýmaǵy turǵyndar úshin yńǵaıly bolýy kerek. Bul jerde qala turǵyndary men qonaqtary bos ýaqyttaryn ótkizip, sýretke túsetin alań bolady», - dedi qala basshysy.

Mámlút tas joly jaǵynan keletin kireberis ózgeredi. Qazirgi tańda Petropavl-Qorǵan tas joly qaıta salynyp jatyr Joldyń 60 shaqyrymyn jóndeıdi. 4,5 shaqyrym kóshelerdiń jaryǵyn, qozǵalysqa arnalǵan 8 jolaqtaǵy belgilerdi jóndeý josparlanǵan.

Petropavldyń ózinde kósheler jóndelip jatyr. Internatsıonalnaıa kóshesi boıymen granıtti jıektastar, gúlzarlar, jańa 7 aıaldama pavılondary ornatylady. Jańa jaryqtandyrýdy zamanaýı tehnologııanyń kómegimen montajdaý jumysy 70 % oryndaldy. Óńir basshysy barlyq jumystar kesteden tys qalmaı, oryndalýy kerek ekenin erekshe aıtyp ketti.

Abaı kóshesi, 84 úıdiń aýlasynda fýtbol alańy salyndy. Turǵyndardyń aıtýynsha, balalar bul jerde tańnyń atysynan keshtiń batysyna deıin oınaýdan sharshamaıtyn bolǵan. Qumar Aqsaqalov jas fýtbolshylarǵa dop syılady. Ol aýlanyń aýmaǵyn abattandyrý máselesi jergilikti atqarýshy bılik ókilderiniń udaıy baqylaýynda júretinin aıtty.

«Petropavlda 36 fýtbol alańy bar. Biz olardy jyl saıyn alyp, ornatamyz. Bıyl taǵy da 10 shaqty alań paıda bolady. Qazirgi tańda 100 aýla jóndeýden ótip úlgerdi. Bul jumysty kelesi jyly aıaqtaımyz», - dep ýáde berdi oblys ákimi.