Petropavldyń ózge ult ókilderi birigip, muqtaj otbasylarǵa kómektesti

PETROPAVL. QazAqparat – Soltústik Qazaqstan oblysy Qazaqstan halqy Assambleıasy «Biz birgemiz» qaıyrymdylyq aktsııasyn uıymdastyryp, kópbalaly otbasylarǵa, jalǵyzbasty analarǵa jáne qarajatqa muqtaj syrqat jandarǵa kómektesti, dep habarlaıdy QazAqparat tilshisi.

SQO «Qoǵamdyq kelisim» KMM málimetinshe, qaıyrymdylyq aktsııasyna etnomádenı birlestikter ókilderi, Volonterlik qozǵalys ortalyǵy, oblystyq máslıhat, «Nur Otan» partııasynyń SQO fılıaly, «Zhas Otan» jastar qanaty jáne kóptegen kásipkerler qoldaý kórsetti.

Petropavlda turatyn Mıhaılovtar otbasynda tórt adam bar: ájesi, anasy jáne eki kishkentaı búldirshin. Oblystyq assambleıa bul shańyraqqa únemi kómektesip turady. Byltyr olarǵa baspanaly bolýǵa jaǵdaı jasady. Balalardyń bireýi mektepke, ekinshisi balabaqshaǵa barady. Analary jumysqa ornalasqan. Qaıyrymdylyq aktsııasy aıasynda otbasyǵa azyq-túlik, Petropavl tigin fabrıkasynan kúrtesheler jáne taǵy da basqa kóptegen syılyqtar tapsyryldy.

Aktsııaǵa qatysýshylar barǵan ekinshi otbasynda jalǵyzbasty áke Aleksandr Marchenko eki ulyn jalǵyz ózi ósirip jatyr. Balalar aqyldy, tárbıeli bolyp ósip keledi. Mektepke, balabaqshaǵa barady. Assambleıa otbasyny óz qamqorlyǵyna alǵan. «Somonıen Sever» tájikterdiń qaýymy «Mektepke jol» aktsııasy aıasynda balalardyń kıimin túgendese, osy joly da is-shara barysynda turmysqa qajet zattar, azyq-túlik jetkizildi.

Al Petropavldaǵy Jastar saraıynda «Mıata» agenttiginiń jetekshisi Ekaterına Bashkatovany qoldaýǵa arnalǵan qaıyrymdylyq kesh ótti. Boıjetken qaterli isikke shaldyqqan. Oblystyq QHA, bıznes qaýymdastyqtar, SQO isker áıelder qaýymdastyǵynyń uıymdastyrýymen kesh aıasynda kondıterlik ónimderdiń, qoldanbaly qolóner buıymdarynyń jármeńkesi ótti. Kontserttik baǵdarlamaǵa óńirdiń shyǵarmashylyq ujymdary qatysty. Nátıjesinde Ekaterınanyń emine 3 mln teńge qarjy jınaldy.