Petropavldyń 20 jastaǵy turǵyny esirtki qylmysy úshin 10 jylǵa sottaldy

PETROPAVL. QazAqparat – Petropavldyń 20 jastaǵy turǵyny asa iri kólemde sıntetıkalyq esirtkimen ustalyp, 10 jylǵa bas bostandyǵynan aıyryldy, dep habarlaıdy QazAqparat tilshisi.

Soltústik Qazaqstan oblysy polıtsııa departamenti baspasóz qyzmetiniń málimetinshe, 20 jastaǵy petropavldyqty aqpan aıynda esirtki qylmysyna qarsy is-qımyl basqarmasynyń qyzmetkerleri ustady. Jigitti tintý kezinde odan 397,62 gramm, kópshilikke «tuz» ataýymen belgili «Alfa-PVP» sıntetıkalyq esirtki tabylyp, tárkilendi. Bul asa iri mólsherge jatady. SQO PD esirtki qylmysyna qarsy is-qımyl basqarmasynyń bastyǵy Jandos Basybaevtyń aıtýynsha, bul esirtki myńdaǵan jasty nashaqorlyqqa tartý úshin jetkilikti.

Kúdiktiniń turǵylyqty jerin teksergen polıtsııa qyzmetkerleri páterden elektrondyq tarazy men býyp-túıý materıaldaryn tapty.

Tergeý barysynda jigittiń 2021 jyldyń qyrkúıeginen bastap sıntetıkalyq esirtki satatyn ınternet-dúkenniń «taratýshysy» retinde «jumys istegeni» anyqtaldy. Telegram messendjeri arqyly saýda júrgizgen ol psıhotroptyq zattardyń asa iri partııalaryn birneshe ret qabyldap, olardy arnaıy oryndarda qaldyrý arqyly taratqan. Petropavlda ǵana emes, Qostanaı oblysynyń Rýdnyı qalasynda da qylmystyq ispen aınalysqan.

«Eske salamyz, esirtki quraldaryn, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, satyp alý, saqtaý, tasymaldaý, jóneltý ne ótkizý - asa aýyr qylmystar sanatyna jatady. Baptyń sanktsııasy 10 jyldan 15 jylǵa deıin bas bostandyǵynan aıyrý jazasyn kózdeıdi. Jeńil jolmen tabys tabamyn dep bolashaǵyńa balta shappa», - deıdi Jandos Basybaev.

Qazirgi ýaqytta ınternet-dúkenniń jumysy toqtatylǵan.