Petropavldyń 18 jastaǵy turǵyny 20-dan astam stýdentti aldap, nesıe rásimdetken

PETROPAVL. QazAqparat – Petropavlda polıtseıler birneshe aı boıy alaıaqtyqpen aınalysyp, stýdentterge nesıe resimdetken 18 jastaǵy bozbalany ustady, dep habarlaıdy QazAqparat tilshisi.

Soltústik Qazaqstan oblysy polıtsııa departamenti baspasóz qyzmetiniń málimetinshe, 18 jastaǵy Petropavl turǵyny stýdentterdi aldap, nesıege telefon alǵyzǵan. Jábirlenýshilerdiń aıtýlarynsha, jas jigit olardy ınternet arqyly taýardy nesıege alýǵa úgittegen jáne keıin aktsııa sharty boıynsha nesıeni óteýdiń qajeti bolmaıdy, ıaǵnı qaryz keshiriledi dep sendirgen. Alaıaqtyń arbaýyna túskender uıaly telefon satyp alǵan. Ony belgili bir syıaqyǵa jigitke ótkizgen. Alaıda ýaqyt óte kele olar ýáde etilgendeı nesıeleriniń jabylmaǵanyn kórgen. Osylaısha, polıtsııa basqarmasyna 20-dan astam aryz tústi. Tártip saqshylary aldanyp qalǵandar sany budan da kóp bolýy múmkin dep otyr.

Jábirlenýshilerdiń árqaısysy orta eseppen 200 myń teńgege deıin shyǵyn shekti. Atalǵan faktiler QR Qylmystyq kodeksiniń 190-baby «Alaıaqtyq» boıynsha Sotqa deıingi tergep-tekserýlerdiń biryńǵaı tizilimine engizildi. Qylmys jasady degen kúdikpen polıtseıler 18 jastaǵy qala turǵynyn ustady.

«Kúdiktiniń sózinshe, ol tamyz aıynan bastap osy tásilmen jastardy aldaı bastaǵan. Tergeýshiler qazir barlyq mán-jaıdy anyqtaý boıynsha jumys júrgizip jatyr. Búginde osy istegi epızodtar 20-dan asady. Kúdiktiniń qurbandary Petropavldyń oqý oryndarynyń stýdentteri», - deıdi Petropavl qalalyq polıtsııa basqarmasy bastyǵynyń orynbasary Álnur Ahmedıarov.

Alaıaq qymbat telefondardy arzanǵa qala bazarlaryna ótkizip otyrǵan. Qazirgi ýaqytta ol ýaqytsha ustaý ızolıatoryna qamaldy.