Petropavldyqtardy ınternet arqyly taqyrǵa otyrǵyzǵan boıjetken ustaldy

ASTANA. QazAqparat - Soltústik Qazaqstan oblysynyń polıtseıleri ınternet arqyly halyqty aldap kelgen alaıaqty qolǵa túsirdi, dep habarlaıdy QazAqparat tilshisi.

Belgili bolǵandaı, polıtsııa qyzmetkerlerine Petropavl qalasynyń eki turǵyny aryz jazǵan. Olar OLX.kz saıtyndaǵy habarlandyrý arqyly páter jaldamaq bolady. Tutqany kótergen áıel daýysy páterdi alǵysy keletinderdiń kóp ekenin aıtqan. Páterdi birinshi almaq bolǵan turǵyndar Qiwi-ámııan arqyly aldyn ala aqshasyn salyp jiberedi. Alaıaq tanysqan kezde basqa esim aıtyp, ózin shynaıy páter ıesi etip kórsetý úshin WhatsApp arqyly bóten adamnyń jeke tólqujatyn jibergen. Aqsha qolyna túskennen keıin tutqany kótermeı qoıǵan.

«Tergeý barysynda polıtsııa qyzmetkerleri kúdiktini qolǵa túsirdi. Kúdikti retinde eshqaıda jumys istemeıtin 24 jastaǵy Pavlodar turǵyny ustaldy. Qazirgi ýaqytta ol QR Qylmystyq kodeksiniń 190-baby 2-bóligi («Alaıaqtyq») boıynsha qylmystyq jaýapkershilikke tartylýda», - delingen SQO Polıtsııa departamentiniń habarlamasynda.

SQO polıtseıleri OLX, «Kolesa», «Krysha» sekildi tanymal qyzmetterdi paıdalanǵanda aldyn ala tólem jasaýǵa asyqpaýǵa shaqyrady.