Petropavldyq ustazdyń avtorlyq oqytý ádistemesi elimizdiń mektepterine engizildi
Soltústik Qazaqstan oblysy bilim basqarmasy baspasóz qyzmetiniń málimetinshe, Elena Belıaeva Petropavldaǵy «Daryn» mektep-lıtseıinde eńbek etedi, bastaýysh synyp muǵalimi. Pedagog-sheber «Ádebıettik oqý. 2-synyp» oqýlyǵyna oqytý-ádistemelik keshendi ázirledi. Ustaz tájirıbesine súıene otyryp, pándi oqytýdyń tásilin ózgertý arqyly ózindik ádistemesin jasady. Avtorlyq ádisteme fýnktsıonaldyq saýattylyqty, atap aıtqanda, oqý saýattylyǵyn qalyptastyrýǵa baǵyttalǵan.
«Oqý-ádistemelik keshenge 2 bólimnen turatyn oqýlyq, 4 bólikten turatyn jumys dápteri, hrestomatııa, jeke jumysqa arnalǵan dısk, muǵalimge arnalǵan ádistemelik qural, elektrondy oqýlyq kiredi.
Oqýlyq pen dápter tapsyrmalarynda synı oılaý daǵdylaryn damytýǵa yqpal etetin túrli strategııalar men ádister qoldanylady, sabaqtar maqsat qoıý, túsiný, refleksııa qurylymy boıynsha qurastyrylǵan. Hrestomatııa balalardyń kitap oqý daǵdysyn qalyptastyrýǵa, kitapqa degen qyzyǵýshylyǵyn arttyrýǵa kómektesedi. Mundaǵy shyǵarmashylyq tapsyrmalar ár balanyń áleýetin jáne ereksheligin ashýǵa yqpal etedi», - deıdi oblystyq bilim basqarmasynyń baspasóz hatshysy Ásel Orazbaeva.
Birneshe jyl qatarynan syn turǵysynan oılaýdy damytýǵa baǵytalǵan bul ádisteme óz tıimdiligi men ózektiligin dáleldedi. Buny oqýshylardyń jetistikteri rastap otyr.
QR Bilim jáne ǵylym mınıstrliginiń buıryǵyna sáıkes bıylǵy oqý jylynda oqý-ádistemelik kesheni 2 synyptyń «Ádebıettik oqý» sabaǵyna respýblıka mektepterinde balamaly oqýlyq retinde paıdalanýǵa qabyldandy. Qazaqstannyń birneshe óńiri, sonyń ishinde Soltústik Qazaqstan oblysy osy ádistemeni tańdap, sol boıynsha oqytyp jatyr.