Petropavldyq ustaz dıetalyq nan pisirýdiń jańa tehnologııasyn ázirledi
Natalıa Loshkareva - Petropavldaǵy Eskendir Dáýitov atyndaǵy qyzmet kórsetý salasy kolledjiniń arnaıy pánder oqytýshysy. Óndiristik oqytý sheberi ustazdyq pen zertteý jumystaryn qatar alyp keledi. Onyń sońǵy jetistikteriniń biri – dıetalyq nan pisirýdiń jańa tehnologııasy.
«Sońǵy kezde dıetalyq taǵamdarǵa suranys artyp keledi. Jurttyń talaby da aıtarlyqtaı artqan. Sondyqtan dıetalyq nandy pisirýde men qanttyń ornyna stevıozıdti, ári tutas dándi undy qoldandym. Stevıozıd – ıissiz, biraq óte tátti aq untaq zat. Ony stevııa ósimdiginiń japyraǵynan jasaıdy. Qanttan 250 ese tátti. Sondaı-aq bakterıtsıdti áseri bar. Bul daıyn ónimdegi dıetalyq talshyqtardyń sanyn kóbeıtýge jáne glıkemııalyq ındeksin tómendetýge múmkindik berdi. Osylaısha, jańa retsept boıynsha pisirilgen nan aǵzaǵa óte paıdaly bolyp shyǵady, qan quramyndaǵy qantty azaıtý qasıetiniń arqasynda dıabetke shaldyqqandarǵa da qaýipsiz», - deıdi Natalıa Loshkareva.
Kolledj ustazy osy jańalyǵyn sabaqta qoldanyp, stýdentterge durys tamaqtaný negizderin túsindiredi, ol boıynsha magıstrlik dıssertatsııa da qorǵaǵan.
Qazir Natalıa dıetalyq tamaqtanýdyń taǵy bir baǵyty boıynsha zertteýler júrgizip keledi. Ol óndiristik ashytqyny zııansyz túrine almastyryp, balamasyn jasap shyqpaq. Óıtkeni, óndiristik ashytqynyń birqatar dertke shaldyqqandarǵa qarsy kórsetilimi bar.
Kolledjdiń óz zerthanasy bar. Munda óndiristik oqytý sheberi stýdentterin zertteý jumystaryna baýlyp, túrli tájirıbe jasaıdy. Aǵzaǵa zııany joq, paıdasy kóp pechene, túrli toqash, nan pisirýge tyrysady. Ol úshin tabıǵı ónim - jańǵaq, piste, irimshik, jemis-jıdekti paıdalanyp, unnyń birneshe túrin biriktiredi. Máselen olar ázirleıtin darshyn men lımon qosylǵan nan qandaǵy qantty qalypqa keltiredi eken.
Bolashaqta kolledj túlekteri óz naýbaıhanalaryn ashyp, bul jetistikterdi óz jumystarynda paıdalanbaq.
Al Natalıa Loshkareva 2021 jyly oblystyq «Úzdik pedagog» kásibı sheberlik baıqaýynda jeńimpaz atandy.