Petropavldyq restoratorlar dárigerlerdi tegin túski aspen qamtamasyz etip jatyr
Petropavldyń restoratorlary respýblıkalyq #dárigerlerdiqolda chellendjine at salysyp jatyr. «SQO restoratorlar men otelerler qaýymdastyǵy» QU tóraǵasy Saıran Hamzın bul jaıynda áleýmettik jelidegi paraqshasynda jarııalady.
«Biz búginnen bastap #dárigerlerdiqolda chellendjine qatysyp jatyrmyz. Koronavırýspen kúreste aldyńǵy shepte júrgen, 24/7 rejiminde jumys isteıtin Jedel járdem qyzmetiniń barlyq dárigerlerine tegin ystyq tamaq jetkizetin bolamyz. Meniń áriptesterimniń bul azǵantaı ǵana kómegi ınfektsııany qalamyzda, elimizde jáne álemde jeńetin kúndi jaqyndatsyn. Bizge qoldaý bildirgen «Tsentr plova», «Hýtorok», «Piccolino», «Tbılısı», «Besbarmak» jáne «Tengrı» qoǵamdyq tamaqtaný oryndary men dámhana-meıramhanalaryna alǵysymdy bildiremin», - dep jazdy Saıran Hamzın.
Petropavldaǵy Jedel járdem qyzmetine kúndelikti 60 adam kezekshilikke túsedi. «SQO restoratorlar men otelerler qaýymdastyǵy» QU atqarýshy dırektory Andreı Frolovtyń aıtýynsha, búgin dárigerlerge túski asty «Kompot» ashanasy jetkizdi.
«Dárigerlerdiń túski asy saǵat 16.00 shamasyna josparlanǵan. Biz búgin osy ýaqytqa qýyrdaq pen tandyr nan jetkizdik. Olar úshin bul kútpegen syı boldy, tańdanystaryn da jasyrmady. Alǵystaryn bildirdi. Dárigerler úılerinen ákelgen tamaqtaryn ishedi eken. Keıbiriniń aýqattanýǵa da ýaqyty tapshy. Jedel járdem qyzmetkerlerine qazir aýyr salmaq túsken. Óıtkeni, turǵyndar dene qyzýy 37 gradýstan kóterilgen jaǵdaıda birden mamandardy shaqyrýǵa mindetti», - deıdi Andreı Frolov.
Ázirshe qaıyrymdylyq aktsııasyna alty kásipker qatysýǵa tilek bildirgen. Olar kezekpen dárigerlerge túski as jetkizetin bolady. Máselen erteń «Tsentr plova» palaýyn ákelse, kelesi kúni «Hýtorok» dámhanasy medıtsına qyzmetkerlerin ýkraınnyń ulttyq taǵamynan dám tatyrmaq.