Petropavldyq otbasy jıyrma jyl boıy sýdyń aqshasyn tólemegen

PETROPAVL. QazAqparat – Petropavldyq otbasynyń paıdalanǵan sý úshin qaryzy 800 myń teńgege jetken. Sýmen qamtıtyn kompanııa sottyń sheshimimen boryshkerlerge qatań shara qoldana bastady, dep habarlaıdy QazAqparat tilshisi.

«Petropavl Sý» JShS baspasóz qyzmetiniń málimetinshe, Petropavl turǵyndary sýmen qamtýshy kompanııaǵa 30 mln teńgege jýyq soma qaryz. Bir otbasynyń bereshegi 800 myń teńgege jetken. Osylaısha olar shamamen 20 jyldaı paıdalanǵan sý úshin kommýnaldyq aqy tólemegen.

«Aıyna ortasha 3,5 myń teńge shyǵady. Qanshama eskertkenimizben qaryzdan qutylýǵa tyryspady. Endi ol páterge kárizdik biteýish qoıylady. Jalpy mundaı qatań shara qoldanbas buryn 30 kún buryn eskertip, tutynýshyǵa habarlama jiberemiz. Eger osy aralyqta qaryzdy tólemese, sottyń sheshimimen kárizdik qubyrǵa biteýish salynady. Ádette mundaı sharany bereshegi 15 myń teńgeden asyp ketkende qoldanamyz. Tólegen jaǵdaıda biteýishti aqsha tólep alǵyzady», - deıdi kásiporynnyń tutynýshylarmen jumys boıynsha bólim basshysy Nurgúl Samalyqova.

Mamandardyń aıtýynsha, biteýish qoıǵannan keıin ǵana turǵyndar qaryzdan qutylýǵa tyrysady.

Al jalpy Petropavlda qazir 500-den astam abonent qasaqana tólemeýshi retinde sýmen qamtıtyn kompanııanyń esebinde tur.