Petropavldyq oqýshylar «Minecraft» platformasynda respýblıkalyq saıys ótkizdi
Petropavldaǵy Nazarbaev Zııatkerlik mektebiniń oqýshylary «Minecraft» oıyn platformasynyń múmkindikterin paıdalanyp, Naýryz merekesine oraı ulttyq oıyndardan saıys uıymdastyrdy. Balalar vırtýaldy túrde kıiz úıler tigip, jarys alańdaryn qurastyrdy.
«Minecraft» - mektep oqýshylary arasynda álem boıynsha joǵary suranysqa ıe oıyn. Oǵan biz ulttyq qundylyǵymyzdy qosýdy jón sanadyq. Oqýshylar saıys erejelerin ózderi jasady. Platformada balalar bir-birimen kúresip, tipti atqa minip shaba alady. Mergendikterin synap kórý úshin «Sadaq atýdy» tańdadyq. Sheteldik oıynǵa osylaısha ulttyq dúnıemizdi qosyp, utymdy paıdalandyq», - deıdi Petropavldaǵy Nazarbaev Zııatkerlik mektebi dırektory Danııar Ýálıev.
Petropavldaǵy Nazarbaev Zııatkerlik mektebi baspasóz qyzmetiniń málimetinshe, jylda NZM jelisinde «Naýryz kezdesýleri» ǵylymı jobalar saıysy uıymdastyrylady. Bıyl karantınge baılanysty dástúrli kezdesý onlaın formatta ótti. Ulttyq oıyndar saıysy sol is-sharaǵa oraılastyrylǵan. Qazaqstandaǵy barlyq Zııatkerlik mektepterdiń oqýshylary «Minecraft» platformasynda kezdesedi. Sharadan keıin de árbir oqýshy mektep serverinde oıyndy jalǵastyra alady.
Nátıjesinde Aqtaýdaǵy NZM oqýshysy Nurgeldi Esengeldi alaman báıgeden jeńimpaz atandy. Kúreste Almatydaǵy NZM oqýshysy Maǵjan Ilambek bárinen basym tústi. Al sadaq atýdan Aqtóbe qalasyndaǵy NZM oqýshysy Islam Bagırov mergendigin kórsetti.
Buǵan deıin Petropavldaǵy NZM oqýshylary «Minecraft» platformasynda Soltústik Qazaqstan oblysynyń kıeli jerleriniń kartasyna engen nysandardyń dál kóshirmesin jasaǵan bolatyn. Jobaǵa Aıǵanym qonysy, Aǵyntaı-Qarasaı batyrlar kesenesi, Botaı qonysy syndy taǵy basqa nysandar endi. Qazir oǵan kez kelgen oıynshy vırtýaldy ǵımarattarǵa kirip saıahat jasaı alady.