Petropavldan elimizdiń ońtústigine, Reseı men Mysyrǵa áýe reısteri ashylmaq
Shilde aıynda Petropavl halyqaralyq áýejaıy saýdaǵa shyǵarylyp, «Qyzyljar» halyqaralyq áýejaıy» JShS-ne 5 jylǵa senimgerlik basqarýǵa berildi. Bul merzimnen keıin ınvestor ony tolyq satyp ala alady.
Áýejaıdyń jańa dırektory Ýálıhan Jylysbaevtyń aıtýynsha, ózgerister bolady, biraq oǵan ýaqyt kerek.
«Bizdiń mindetimiz – avıatsııalyq qaýipsizdikti, ushý qaýipsizdigin qamtamasyz etý, áýejaıdy kútip ustaý jáne paıdalaný. Múlikti baǵalaý quny boıynsha 2,8 mlrd teńge tóledik. Talap boıynsha damytýǵa taǵy 1,2 mlrd teńge jumsaýymyz qajet. Jaqyn arada janar-jaǵar maı keshenin jóndep, jańartamyz. Osydan keıin ushaqtar bul jerge toqtap, janar maı quıatyn bolady. Áýejaıdyń ornalasqan jeri geografııalyq turǵydan óte qolaıly. Túngi reıster jumys isteýi úshin bolashaqta júk ushaqtaryn qabyldamaqpyz», - dedi ol.
Qazir Petropavl áýejaıynda 100-ge jýyq adam eńbek etedi. Shtat áli de ulǵaıtylmaq. Jańa basqarýshynyń aıtýynsha, bolashaqta Shymkent pen Túrkistanǵa, Reseıdiń Túmen men Sankt-Peterbor qalalaryna, Mysyrdyń Sharm-ál-Sheıhine reıster ushpaq. Búginde Almaty men Nur-Sultan qalalaryna ǵana baǵyttar bar.
«Azamattyq avıatsııa komıtetine biz Shymkent pen Túrkistanǵa áýe kompanııalarynyń reısterin ashý týraly ótinim berdik, alaıda konkýrs ótpedi. Kelesi jyly sýbsıdııalanǵan reıster bolady dep oılaımyn. Árıne, tarıf tómen bolýy tıis, bul – halyq úshin mańyzdy. Reseılik áýe kompanııalarymen de kelisim bar. Osy jyly sanktsııalarǵa baılanysty oıymyz júzege aspady. Petropavldan Mysyrǵa ushý máselesi kópten kókeıde júr. Janar-jaǵar maı kesheni jumys istegen jaǵdaıda áýe kemelerin bıyl-aq jiberer edik. Keshen jóndelip, iske qosylysymen shetelge reıster ashylady, qazirdiń ózinde kelisim bar. Qazirgi ýaqytta qysqa merzimge arnalǵan damý josparyn jasap jatyrmyz», - dedi Ýálıhan Jylysbaev.
Buǵan deıin habarlaǵanymyzdaı, qazir eldiń azamattyq avıatsııa salasynda 20 myńǵa jýyq adam jumys isteıdi. Salanyń damýyna baılanysty 2025 jylǵa qaraı qyzmetkerlerge degen suranys sany jyl saıyn 500-600 adam bolýy múmkin.