Petropavldaǵy jertóleden bir tsentnerden astam marıhýana tárkilendi
Maqsatty jedel-izdestirý is-sharalarynyń nátıjesinde SQO PD esirtki qylmysyna qarsy is-qımyl basqarmasynyń qyzmetkerleri Petropavl qalasynyń 36 jáne 48 jastaǵy eki turǵynyn ustady. Olardyń bireýiniń Gogol kóshesindegi úıiniń jertólesinen polıtseıler 4 qap ósimdik tektes zatty tárkiledi.
Saraptama kórsetkendeı, bul jalpy salmaǵy 113 keliden asatyn keptirilgen marıhýana bolyp shyqty. Atalǵan fakt QR QK-niń 297-baby boıynsha sotqa deıingi tergep-tekserýlerdiń biryńǵaı tiziliminde tirkeldi. Ótkizý maqsatynda asa iri mólsherde esirtki saqtady degen kúdikpen ustalǵandardyń biri qamaýǵa alyndy, ekinshisine qatysty kelý týraly mindetteme túrindegi májbúrleý sharasy tańdaldy.
Tergeý júrip jatyr, polıtsııa qyzmetkerleri iri kólemdegi esirtki mólsheriniń shyǵý tegin anyqtaýy kerek.
«Bul - oblysta jyl basynan beri tárkilengen marıhýananyń ekinshi asa iri partııasy. Teorııalyq turǵydan alǵanda, tárkilengen salmaq Petropavldyń barlyq turǵyndaryn nashaqorlyqqa tartý úshin jetkilikti. Esterińizge sala keteıik, esirtki satqany úshin asa iri mólsherde 10 jyldan 15 jylǵa deıin bas bostandyǵynan aıyrý jazasy qarastyrylǵan», – dedi SQO PD esirtki qylmysyna qarsy is-qımyl basqarmasynyń bastyǵy Ivan Terzıdı.
Jyl basynan beri oblys polıtseılerimen 600 keliden astam túrli esirtki, onyń ishinde 1 keliden astam sıntetıkalyq esirtki tárkilendi.