Petropavldaǵy JEO-2 qorshaǵan ortany qorǵaýǵa 1 mlrd teńge jumsaǵan

PETROPAVL. QazAqparat – Petropavldaǵy 2-Jylý-elektr ortalyǵy byltyr qorshaǵan ortany qorǵaýǵa 1 mlrd teńge jumsady. Nátıjesinde kásiporyn bóletin zııandy zattar mólsheri ótken jylmen salystyrǵanda 27,8 paıyzǵa azaıdy, dep habarlaıdy QazAqparat tilshisi.

Óńirlik kommýnıkatsııalar qyzmetinde «Petropavl qalasynda qorshaǵan ortaǵa barynsha áser etetin «Sevkazenergo» AQ JEO-2 kásipornynyń qyzmeti týraly» brıfıng ótti.

Petropavl jylý-elektr ortalyǵy – Soltústik Qazaqstanda aýany eń kóp lastaıtyn kásiporyn. Qorshaǵan ortaǵa túsetin zııandy zattardyń shamamen 70% osy nysanǵa tıesili.

«Jylý-elektr ortalyǵy – qorshaǵan ortaǵa eleýli teris áser etetin birinshi sanattaǵy nysanǵa jatady. Shyǵaryndylardyń negizgi kózi – stantsııanyń qazandyq agregattarynda kómir men mazýtty jaǵý saldarynan paıda bolatyn tútin gazy.

Kásiporynnyń byltyr 50,7 myń tonna lastaýshy zattar shyǵarýǵa ruqsaty boldy, biraq normatıv kóleminiń tek 36,1% ǵana paıdalandy. Aýaǵa taraǵan zııandy shyǵaryndylardyń kólemin 2021 jylmen salystyrǵanda 27,8%, ıaǵnı 25,4 myń tonnadan 18,3 myń tonnaǵa deıin azaıtty», - deıdi «Sevkazenergo» AQ qorshaǵan ortany qorǵaý basqarmasynyń bastyǵy Nıkolaı Maksımov.

Strategııalyq nysan jylý jáne elektr energııasyn óndirýge qajet kómirdi tutynýdy 3,5%, mazýtty tutyný 17,9% tómendetti.

«Qorshaǵan ortany qorǵaý salasyndaǵy jumystyń tıimdiligin arttyrý úshin «Sevkazenergo» AQ óz jumysynyń qorshaǵan ortaǵa áser etý deńgeıin tómendetýge jáne óz kásiporyndarynyń ekologııalyq tıimdiligi men qaýipsizdigin arttyrýǵa baǵyttalǵan is-sharalardy josparlaıdy jáne ony iske asyrady. Byltyr osy maqsatqa jumsalǵan shyǵyndardyń jalpy somasy kúrdeli jóndeýlerdi esepke almaǵanda 1 mlrd teńgeni qurady.

Sonyń ishinde atmosferalyq aýany qorǵaýǵa baǵyttalǵan eń mańyzdy tabıǵatty qorǵaý sharalary: kúl ustaǵysh qondyrǵylardyń, aýa ótkizgishterdiń, gaz ótkizgishterdiń tozǵan elementteri jóndeldy, naqty ýaqyt rejıminde óndiristik ekologııalyq monıtorıngtiń avtomattandyrylǵan stantsııalarynyń jumys isteýi qamtamasyz etildi, №2 jáne № 3 kúl úıindisiniń qorshaý bógeti salyndy, energııa nysandaryn jańǵyrtý jáne salý barysynda paıda bolǵan qaldyqtardy jınaý oryndary uıymdastyryldy jáne kásiporynnyń sanıtarlyq-qorǵanys aımaǵyna úıeńki men qaraǵannyń 1400 kósheti otyrǵyzyldy», - deıdi Nıkolaı Maksımov.