Petropavldaǵy túzetý mekemesinde «aýyldar saıysy» is-sharasy ótti

PETROPAVL. QazAqparat – Soltústik Qazaqstan oblysy boıynsha qylmystyq atqarý júıesi departamenti (QAJD) ES-164/6 mekemesinde «Aýyldar saıysy» is-sharasy ótti, dep habarlaıdy QazAqparat tilshisi.

SQO boıynsha QAJD baspasóz qyzmetiniń málimetinshe, ES-164/6 mekemesi – áıelder kolonııasynda jazasyn ótep jatqandar qonaqjaılylyq ónerinde jarysty. Naýryz meıramyna oraı munda merekelik is-shara ótti. Sottalǵandar án aıtyp, bı bılep, ulttyq taǵamdardy ázirledi, salt-dástúrlerdi kórsetti. Kontserttik baǵdarlamanyń ornyna bıyl «Aýyldar saıysy» uıymdastyryldy. Sottalǵandar bir ýaqytta eki aýyldyń turǵyndary boldy.

Іs-shara eki aýyldyń qatysýshylary arasynda tórt kezeńde ótkizildi. Til jáne sheshendik ónerdi damytý úshin jarystyń birinshi kezeńi qonaqtardy qarsy alý, tanystyrý jáne quttyqtaý boldy, onda qatysýshylar maqal-mátelderdi qoldana otyryp, tildiń ótkirligin, qazaq halqynyń sheshendigin, sondaı-aq túrli salttardy kórsetti.

Jarystyń ekinshi kezeńinde qatysýshylar ulttyq taǵamdardy ázirledi. Munda sottalǵandar ózderiniń tapqyrlyǵy men sheberlikterin kórsetti.

Saıystyń kelesi kezeńi halyq aýyz ádebıetiniń týyndysyn, qazaq halqynyń ańyzdary negizinde batyrlardyń beınesin kórsetý kerek boldy.

Jarystyń sońǵy kezeńi shyǵarmashylyq tapsyrma boldy. Sottalǵandar óz ónerlerin kórsetýge múmkindik aldy.

«Aýyldar saıysyna» biz óz kúshimizben daıyndaldyq, ákimshilikpen kelisip, kostıýmder tigip, nan pisirdik, búgin biz «Naýryz kóje» daıyndadyq. Mundaı is-sharalar ujymdy óte jaqsy biriktiredi. Biz jasaqta kóppiz jáne árkimniń óz minezi bar, soǵan qaramastan bárimiz birge jınalyp, bárin jasaımyz. Keı kezeńderge - sálemdesýge, kórinister oılap taýyp, bılerge aldyn ala daıyndalsaq, aspazdyq saıysta negizinen ımprovızatsııa jasadyq. Úsh mınýt ishinde qamyrdan ulttyq taǵam jasaý kerek boldy. Bireýler kespe kesse, bireýler baýyrsaq pisirdi», - deıdi sottalǵan Álııa Dáýrenbekova.

Áıelder kolonııasynda 230-dan astam adam jazasyn óteıdi. Olardyń basym bóligi mekemede uıymdastyrylatyn is-sharalarǵa belsene qatysady.

«ES-164/6 mekemesinde ótkiziletin barlyq tárbıelik is-sharalardyń maqsaty sottalǵandardy túzeý. Belsendilik tanytqandar mekeme bastyǵynyń quqyqtarymen marapattalady, alǵys jarııalanady, ol jeke iske engiziledi jáne keıinnen sottalǵandardyń oń minez-qulyq dárejesi retinde aıqyndalady», - deıdi SQO boıynsha QAJD ES-164/6 mekemesi tárbıe bóliminiń bastyǵy Oksana Vyshar.