Petropavldaǵy stadıon 1,3 mlrd teńgege ÝEFA standarttaryna sáıkes jóndelip jatyr
SQO qurylys, sáýlet jáne qala qurylysy basqarmasy baspasóz qyzmetiniń málimetinshe, Petropavldaǵy «Qarasaı» stadıony ÝEFA standarttaryna saı bolýy úshin sport nysanynyń qaýipsizdik júıesi aýystyrylady, fýtbolshylarǵa qys túskenshe osy jerde jattyǵýǵa jaǵdaı jasalyp, alań jylytylatyn bolady. Kıim aýystyratyn bólme de talapqa saı ózgertiledi. Merdiger kompanııa qurylys materıaldaryn Germanııa men Italııadan tapsyryspen jetkizip jatyr.
Merdiger kompanııanyń basshysy Áset Meńdibaevtyń aıtýynsha, qazirgi ýaqytta jumysqa 6 tehnıka men 20 maman jumyldyrylǵan.
«Bul jerde jylý jelisi jańartylyp, syrtqy jaryqtandyrý júıesin retke keltiriledi. Sport keshenin jaryqtandyrýǵa 40 metrlik 4 baǵana qoıylady. Buǵan deıingileri nebári 22 metr bolǵan. Sondaı-aq, 26 mln teńgege úlken tablo men 10 mln teńgege dybys qurylǵysy satyp alynady. Al jumystyń ÝEFA standarttaryna saı iske asyrylýyn ıtalıandyq «Scarabelli Irrigation Systems» kompanııasynyń ókilderi qadaǵalaıdy», - deıdi Áset Meńdibaev.
Merdiger kompanııa jumysty osy jyldyń kúzine deıin aıaqtaýdy josparlap otyr.
«Bizdiń basty maqsatymyz - stadıonnyń ÝEFA standarttaryna sáıkes bolýyn qadaǵalaý. Biz bul jerde jumys istep jatqan mamandarmen kezdesip, óz tájirıbemizben bólisip, aqyl-keńesterimizdi aıtyp jatyrmyz. Ózara tyǵyz yntymaqtastyq Qazaqstanda fýtboldyń damýyna úlken sep bolady degen úmittemin. Jumys aıaqtalǵan soń bul stadıondy qabyldaımyz», - deıdi «Scarabelli Irrigation Systems» kompanııasynyń ókil Djannı Foraboskı.