Petropavldaǵy sábıler úıiniń qurylǵanyna 100 jyl toldy

PETROPAVL. QazAqparat – Petropavlda 10 myńnan astam balaǵa kómek kórsetip, qoldaý bildirgen áleýmettik mekeme – sábıler úıine 100 jyl tolyp otyr, dep habarlaıdy QazAqparat tilshisi.

Petropavldaǵy sábıler úıi búgin saltanatty túrde ǵasyr toıyn atap ótti. Qazirgi ýaqytta mekemede ata-ana qamqorlyǵynsyz qalǵan 42 bala tárbıelenip jatyr. Bul jerde sábılerdi 3 jasqa deıin ustaıdy. Olar 100-ge jýyq mamannyń – tárbıeshilerdiń, dárigerler men medbıkelerdiń qamqorlyǵynda.

Zamanaýı jaraqtandyrylǵan mekemede mýzyka zaly, densaýlyqty túzeýge arnalǵan logoped, fızıo, sensor, dene shynyqtyrý kabınetteri jumys isteıdi. 42 bala 5 topqa bólingen. Solardyń biri «Úmit» toby. Munda jumyssyz, úısiz qalǵan kelinshekter ózderiniń ul-qyzdaryn ýaqytsha ornalastyra alady.

«Sábılerin ýaqytsha qaldyrǵan analar jaǵdaılaryn túzegennen keıin balalaryn alyp kete alady. Alaıda sábıdi qolyna bermes buryn onyń turmys jaǵdaıyn tekseremiz. Jumys taýyp, balasyn asyra alatyndaı jaǵdaıda ǵana ákete alady», - deıdi sábıler úıiniń dırektory Lılııa Fedotova.

Mekeme jumys istegen 100 jyl ishinde 10 myńnan astam bala bul jerde kómek alyp, qoldaýǵa ıe boldy. Olardyń 40 %-y ǵana bıologııalyq áke-sheshesimen qaýysha aldy. Jetimderdiń 30 %-yn meıirimdi jandar óz qamqorlyǵyna aldy.

Bıyl sábıler úıinde jyl basynan 94 náreste bolsa, olardyń 52-si týǵan ata-anasyna tapsyryldy. Taǵy 8 sábıdi qamqorlyqqa aldy. Al 3 jastan asqan 3 bala Polýdıno aýylyndaǵy balalar úıine aýystyryldy.