Petropavldaǵy mektep oqýshysy UBT-dan 128 ball aldy
SQO bilim basqarmasy baspasóz qyzmetiniń málimetinshe, UBT-da oblys boıynsha ázirge eń joǵary ball jınaǵan Dmıtrıı Annenkov Petropavl qalalyq birinshi jalpy bilim beretin IT lıtseıiniń túlegi. Ol test tapsyrýǵa beriletin múmkindiktiń alǵashqysynda 128 ball jınady.
«UBT-ǵa birneshe aı daıyndalym. Túrli nusqalarymen jumys istedim. Biraq UBT kezinde, menińshe, suraqtar qıyndaý boldy. Beıindik pánder retinde men matematıka men fızıkany tańdaǵan edim. Matematıka 11 jyl boıy meniń súıikti pánim boldy», - deıdi Dmıtrıı Annenkov.
Bıyl bul oqý ornyn 39 túlek bitirmek. Olardyń birqatary 120 upaıdan joǵary nátıje kórsetip úlgerdi.
«Bıylǵy túlekter úshin oqý jyly ońaı bolǵan joq. Alǵashqy eki toqsandy qashyqtan oqydy. Sondyqtan UBT-ǵa daıyndyqty úshinshi toqsannan ǵana bastadyq. Bizdiń oqýshymyz búgingi kúni oblys boıynsha eń joǵary ball alyp otyr, muny maqtanyshpen aıtamyz. UBT-nyń aıaqtalýyna áli bir aı ýaqyt bar. Sondyqtan budan da joǵary kórsetkishke áli de qol jetkizemiz dep oılaımyn», - deıdi Petropavl qalalyq birinshi jalpy bilim beretin IT lıtseıiniń dırektory Oksana Novıkova.
«Altyn belgige» úmitker Dmıtrıı Annenkov endi mekteptegi emtıhandaryna daıyndalmaq.
«UBT-da alǵan upaıym kóńilimnen shyqty. Óıtkeni men ózime 120-dan kem almaımyn dep meje qoıǵan edim. Mehanıka-matematıkalyq fakýltetke, qoldanbaly matematıka jáne ınformatıka mamandyǵy boıynsha túspekpin, ǵylym jolyn tańdaýym múmkin», - deıdi mektep túlegi.
Bıyl SQO-da 11-synyptyń 2456 oqýshysy UBT tapsyrýǵa ótinish bergen edi.