Petropavldaǵy qazaq teatry qurylysy qazan aıynda paıdalanýǵa berilmek
Búgin SQO ákimi Qumar Aqsaqalov Petropavldaǵy jańadan salynyp jatqan qazaq teatrynyń qurylysynda boldy. 2019 jyly iske qosylýy tıis mádenıet nysany merdiger kompanııanyń óz mindettemelerin ýaqytynda oryndamaýynan salynbaı turyp qaldy. Sot arqyly ol josyqsyz qyzmet kórsetý uıymy dep tanylyp, qurylys jergilikti kompanııalardyń birine berildi.
Qazir munda jumys qyzǵan. Qurylystyń 75-80 % atqaryldy.
«Qazaq teatrynda ár qyzmettiń tolyq jabdyqtalǵan óz bólmeleri bolady. Akýstıkalyq júıesi bar árleý materıaldaryn alys shetelden ákelip jatyrmyz. Ol sahnada ártisten óner kórsetip jatqanda, qalǵandary kedergi keltirmes úshin jasalǵan. Sondaı-aq dybys sapaly, taza shyǵýy úshin osyndaı qymbat jáne zamanaýı materıaldardy qoldanyp jatyrmyz. Ekinshi qabatta eki býfet bolady. Ol kórermender bir-birine kedergi keltirip, kezek kútpeýi úshin jasalǵan.
Qazan aıynda qurylysty aıaqtaýdy josparlap otyrmyz. Qazir bul jerde 150 adam eńbek etip jatyr. Demalyssyz qurylys basynda júr. Bıyl mindetti túrde teatrdy paıdalanýǵa beremiz. Jobanyń jalpy quny 4 mlrd teńge», - deıdi SQO qurylys basqarmasynyń basshysy Qaırolla Ǵaleev.
Qazaq drama teatry 500 orynǵa shaqtalǵan. Munda 64 grıdeý bólmesi bolmaq. Al mádenıet nysany qalypty jumys isteýi úshin 350 adam jumysqa alynbaq.
Mamandardyń aıtýynsha, tóbesi kópdeńgeıli bolady, qabyrǵalary ulttyq naqyshta bezendiriledi. Al mármár baspaldaq ǵımarattyń kórkin asha túspek.
Ashyq kózderden alynǵan foto