Petropavldaǵy qańǵybastardyń basym bóligi - tepse temir úzetin jigitter
Soltústik Qazaqstan oblysy polıtsııa departamenti baspasóz qyzmetiniń málimetinshe, qalalyq polıtsııa basqarmasy qabyldap-taratý ornynyń qyzmetkerleri turǵylyqty mekenjaıy joq tulǵalardy anyqtaý úshin kún saıyn reıdter júrgizedi. Maqsat - qystyń kózi qyraýda qańǵybastardy úsik alýdan qorǵaý. Mobıldik top saǵat 16.00-den túngi saǵat 00:00-ge deıin jumys isteıdi. Qyzmetkerler kóshege bir shyqqanda orta eseppen 8 qańǵysbasty polıtsııaǵa jetkizedi eken.
Podezder, jertóleler, jylý qubyrlary, qoqystar men bazarlar – turǵylyqty mekenjaıy joq adamdardyń júretin jerleri udaıy tekseriledi. Qajet bolǵan jaǵdaıda mobıldi top baǵyttaryna jedel ózgertý engizedi. Qylmystardy ashý, iz-túzsiz joǵalǵandar, qylmyskerlerdi izdeýmen qatar, polıtseılerdiń mindetine qańǵybastar tarapynan ne olarǵa qatysty jasalǵan qylmystar men quqyq buzýshylyqtardyń aldyn alý kiredi.
39 jastaǵy Denıstiń jylý qubyrlarynda, qudyqtarda túnep júrgenine birneshe aı bolǵan. Negizinen qoqysqa tastalǵan azyq-túlik qaldyqtarymen júrek jalǵaıdy, keıde volonterler men meıirimdi jandar kómektesedi eken. Aıazdy kúnder Denıs sııaqty kezbelerge asa qaýipti, úsik alýy múmkin. Sondyqtan polıtsııanyń mobıldi toby qańǵybastardy kúnde keshke Jumysshy kentinde ornalasqan arnaıy túneý ornyna jetkizedi.
Petropavl qalalyq PB qabyldap-taratý ornynyń bastyǵy Adaı Smaıyldyń aıtýynsha, ótken jyldyń 12 aıy ishinde bul jerge turǵylyqty mekenjaıy joq 1976 adam jetkizilgen. Qabyldaý ornyna onyń 239-y ornalastyryldy. Jetkizilgenderdiń barlyǵy polıtsııanyń tizimdik esebine qoıyldy. Sonymen qatar, qylmys jasaýda kúdikti dep tanylǵan, izdeýde júrgen 5 adam anyqtaldy. Taldaý, qańǵybastardyń arasynda 33-44 jastaǵy adamdardyń jıi kezdesetinin kórsetti. Olardyń basym bóligi - er azamattar.