Petropavldaǵy áskerı joǵary oqý ornynda daýys berý aıaqtaldy

PETROPAVL. QazAqparat – Petropavldaǵy QR Ulttyq ulany akademııasynda 600-den astam adam tańǵy saǵat 9.30-ǵa deıin daýys berip, № 655 saılaý ýchaskesi jumysyn aıaqtady, dep habarlaıdy QazAqparat tilshisi.

QR Ulttyq ulan akademııasy baspasóz qyzmetiniń málimetinshe, Petropavldaǵy akademııada №655 saılaý ýchaskesi ornalasqan. Bul jerde joǵary oqý ornynyń kýrsanttary, ofıtserler, sarbazdar, kelisimshart boıynsha qyzmet atqaryp jatqan áskerı qyzmetshiler jáne olardyń otbasy músheleri daýys berdi. Degenmen saılaýshylardyń 99 paıyzy – akademııa kýrsanttary.

«Almatynyń týmasymyn. Úshinshi kýrsta oqımyn. Saılaýǵa ekinshi ret qatysyp otyrmyn. Prezıdent ol memleketimizdiń ósip-órkendeý jáne damý baǵytyn aıqyndaıtyn bolǵandyqtan, durys tańdaý jasaý óte mańyzdy. Ár qazaqstandyq búgin óz daýysyn berip, durys sheshim qabyldaıdy degen oıdamyn», - deıdi QR Ulttyq ulany akademııasynyń kýrsanty Aıdos Jumaǵulov.

Ulttyq ulan akademııasyndaǵy saılaý ýchaskesinde daýys berý belsendi ótti.

«Bul saılaý ýchaskesine 662 saılaýshy tirkelgen, 77 kýrsant alǵash ret daýys berdi. Eldiń tynyshtyǵy men bolashaǵy úshin daýys berip jatyr», - deıdi № 655 saılaý ýchaskesiniń komıssııa tóraǵasynyń hatshysy Ardaq Aıtjanov.

Áskerı tártipke úırengen jandar saǵat 9.30-da tańdaýlaryn jasap boldy.