Petropavldaǵy Jumysshy kentindegi birneshe kóshe turǵyny jaryqsyz qaldy
Petropavl turǵyny Erlik Ǵabbasov Jumysshy kentindegi Lazýtın kóshesinde turady. Turǵynnyń aıtýynsha, keshe jańbyr bastalysymen-aq saǵat 17.00 kezinde jaryq sónip qalǵan.
«Men úıge 18.00-den kete keldim. Jaryq qana emes, telefon da istemeı turdy. Elektr qýatyn tek saǵat 22.00-de berdi. Sodan beri bizde sóngen joq. Al, kórshi kósheler áli kúnge jaryqsyz otyr», - deıdi Erlik Ǵabbasov.
Jánııa Qanapına Jumysshy kentindegi Panfılov kóshesinde turady. Bul kóshe turǵyndary kesheden beri elektr jaryǵy berilmegenin aıtady.
«Keshe saǵat 22.00 kezinde berdi de, túngi saǵat 00.00 shamasynda qaıta sónip qaldy. Biz jaýynmen baılanystyryp, berer dep kútip otyrmyz. Tońazytqyshymyz erip, aǵa bastady», - deıdi qala turǵyny.
Petropavldy elektr energııasymen qamtýshy kompanııa – «Sevkazenergosbyt» JShS dıspetcherlik qyzmetiniń málimetinshe, Jumysshy kentin apattyq sóndirýge týra kelgen. 6 maýsym kúni bolǵan jaýyn-shashyn kezinde elektr symy úzilgen. Qazirgi ýaqytta apattyq brıgadalar jumys istep jatyr, keı kóshelerde elektr qýaty berilip, jaǵdaı qalpyna keldi.
«Sevkazenergo» AQ baspasóz qyzmeti dabyl qaǵarlyq jaǵdaı bolmaǵanyn habarlady. Aldaǵy ýaqytta atalmysh oqıǵanyń mán-jaıyn anyqtap, jaýabyn bermek.
«Qazgıdromet» RMK SQO fılıalynyń málimetinshe, ótken táýlikte óńirdiń aýa raıyna soltústik-batystan kelgen tsıklon áser etken. Saldarynan ekpini sekýndyna 15-20 metrge deıin jetetin jel turyp, burshaq aralas jańbyr jaýdy, naızaǵaı oınady. Mundaı aýa raıy oblysta búgin de saqtalmaq. Sınoptıkter daýyldy eskertý jarııalady.
Buǵan deıin SQO-da 5 kúnde jasóspirimderdiń túnde serýendeýiniń 84 deregi tirkelgenin jazǵan edik.