Petropavldaǵy jylý-elektr ortalyǵynyń jańa murjasy irgetasyna deıin buzylatyn boldy

<p>Petropavldaǵy 2-jylý-elektr ortalyǵynyń tútin murjasy negizine deıin buzylady. Jobanyń avtory - &laquo;Sevkazenergoprom&raquo; JShS mamandary tıisti zertteýler júrgizip, resmı qorytyndy berdi, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

Byltyr 8 tamyz kúni JEO-2-niń qulaǵan murjanyń ornyna salynyp jatqan jańasy bir jaǵyna qısaıyp ketip, nysandaǵy qurylys toqtaǵan edi.

«Sevkazenergo» AQ baspasóz qyzmetiniń málimetinshe, qazir osy tútin murjasyna qatysty tıisti esepter júrgizilip, qorytyndysy shyǵaryldy. «Sevkazenergoprom» ǵylymı-óndiristik fırmasy» JShS-nyń mamandary tútin murjasyn irgetasyna deıin buzýǵa keńes berdi.

«Konýstyq jyljymaly qalyptyń júıesin durys ornatyp, ony montajdaý úshin qosymsha konstrýktsııalardy kóterýge ýaqytsha jáne eńbek shyǵyndaryn boldyrmaý maqsatynda jáne bastysy buǵan deıin kóterilgen jáne ári qaraı salynatyn oqpannyń bólikteriniń arasynda «sýyq japsar» bolmaýy úshin, armatýralaryn saqtaı otyryp, irgetasqa deıin temirbeton bóligin bólshekteý qajet», - deıdi jobalyq ınstıtýttyń bas dırektory Vladımır Peshkov.

2024 jyldyń 1 naýryzyna deıin tútin murjasy bólshektelip alynbaq.

«Jobalaý ınstıtýtynyń qorytyndysyn negizge aldyq. Sosyn «TeploHımMontaj» AQ qosalqy merdigermen birlesip 1 sáýirden bastap +5S ortasha aýa temperatýrasy ornaǵan kezde qosalqy merdigerdiń tehnologııasyn paıdalana otyryp, murja qurylysyna kirisemiz. Sonymen qatar nysan qurylysynyń merzimi, sondaı-aq joba somasy ózgerissiz qalady. 2024-2025 jyldarǵy jylytý maýsymynyń bastalýyna qaraı paıdalanýǵa beremiz», - dedi «Kazteplospetsstroı» JShS bas dırektory Konstantın Bıgojın.

Petropavldaǵy JEO-2-niń tútin murjasy «Sevkazenergo» AQ jáne aktsıonerlerdiń qarjysyna salynady.

2022 jyldyń naýryz aıynda qulaǵan murjanyń ornyna salynatyn jańa murjanyń bıiktigi 180 metr bolýy tıis.

Salynyp bitkennen keıin oǵan stantsııadaǵy 12 qazandyq agregatynyń jeteýi qosylmaq.