Petropavldaǵy órtengen jabyq fýtbol maneji alty jyl buryn 45 mln teńgege salynǵan

<p>PETROPAVL. KAZINFORM &ndash; Petropavlda tolyq janyp ketken fýtbol manejinde 400-den astam bala jattyǵyp kelgen.</p>

- Saǵat 8.00 kezinde maǵan telefon shalyp, garajdan tútin shyǵyp jatqanyn aıtty. Al garajda eki traktor jáne Gazel kóligi turǵan. Olar janyp ketti. Jalyn qasynda turǵan fýtbol manejine aýysyp, lap ete tústi. Іshinde adam bolmady. Balalar jattyǵýǵa endi kele bastaǵan edi. Kıim aýystyryp jatyp, órtti kórip, birden qaýipsiz jerge shyqty. Eshkim zardap shekken joq, - deıdi «Qyzyljar» balalar men jasóspirimder sport mektebiniń dırektory Aısary Shákirov.

Soltústik Qazaqstan oblystyq Sport jáne dene shynyqtyrý basqarmasy baspasóz qyzmetiniń málimetinshe, «Qyzyljar» BJSM balansynda «Jastar» stadıony, eki qabatty ákimshilik ǵımarat jáne jabyq fýtbol maneji kiredi. 

Foto: SQO TJD

Fýtbol maneji 2018 jyly naýryz aıynda saltanatty túrde paıdalanýǵa berildi. Ol óńirdegi fýtbol oınaýǵa arnalǵan alǵashqy jabyq maneji boldy. Qurylysyna shamamen 45 mln teńge jumsaldy. Aýmaǵy - 30 m h 72 m. 2021 jyly nysannyń jylytý júıesine kúrdeli jóndeý júrgizilse, byltyr, shatyrynyń jabyndysy aýystyrylǵan eken. 

Foto: SQO TJD

Manejde Petropavl mektepteri men kolledjderiniń 8 ben 17 jas aralyǵyndaǵy 426 oqýshysy shynyǵyp kelgen. Olardyń 184-i – fýtbol bólimshesinde, 216-sy – fýtzaldan jáne 26-sy shóptegi hokkeı bólimshesinde bolǵan. Qazirgi ýaqytta jattyǵý protsesin úzbeý úshin arnaıy oryn bólý máselesi sheshilip jatyr. 

Foto: SQO TJD

Esterińizge salaıyq, búgin tańerteń Petropavldaǵy «Jastar» stadıonynda jabyq fýtbol maneji janyp ketken edi.