Petropavldaǵy órt: eki bala men áıeldiń ólimine otaǵasy kináli bolýy múmkin

<p>Petropavlda eki sábı men kelinshektiń ólimine otaǵasy kináli bolýy múmkin. Qylmystyq is qozǵalyp, 25 jastaǵy kúdikti qamaýǵa alyndy, dep habarlaıdy Kazinform.</p>

Esterińizge salaıyq, oqıǵa qyrkúıek aıynyń sońynda bolǵan edi. Petropavldaǵy Volochaevskaıa kóshesinde jeke turǵyn úı órtenip, órt sóndirý barysynda órt ornynan 3 adamnyń – 20 jastaǵy kelinshektiń, 5 jáne 1 jastaǵy eki balanyń denesi tabylǵan edi.

Úı ıesi – 25 jastaǵy jigit terezeni buzyp shyqqanymen, otbasy múshelerin qutqara almaǵan.

Soltústik Qazaqstan oblysy Polıtsııa departamenti baspasóz qyzmetiniń málimetinshe, bul derek «Órt qaýipsizdigi talaptaryn buzý» baby boıynsha Sotqa deıingi tergep-tekserýlerdiń biryńǵaı tizilimine engizildi.

Endi qylmystyq is «Eki jáne odan da kóp adamdy óltirý» baby boıynsha qaralyp jatyr.

«SQO Polıtsııa departamenti tergeý basqarmasy osy fakti boıynsha qylmys quram bolǵandyqtan qosymsha qylmystyq is tirkedi. Barlyq tıisti sottyq saraptamalar taǵaıyndaldy. Qylmystyq is boıynsha jedel tergeý toby quryldy, barlyq qajetti tergeý áreketteri júrgiziledi.
Qylmystyq is oblys prokýratýrasy jáne polıtsııa departamenti basshylyǵynyń baqylaýynda», - delingen baspasóz habarlamasynda.

Kúdikti er adam qazirgi ýaqytta ýaqytsha ustaý ızolıatorynda otyr.