Petropavldaǵy mektepterdiń birinde oqý ozattaryna shákirtaqy tólenedi

<p>Petropavldaǵy Ǵabıt Músirepov atyndaǵy № 43 orta mekteptiń úzdik oqýshylary aı saıyn shákirtaqy alyp keledi. Qazir oqý ordasynda shamamen ár toǵyzynshy bala &ndash; oqý ozaty. Shákirtaqy alý úshin oqýshylar basqa mektepten de aýysatyn bolǵan, dep habarlaıdy Kazinform.&nbsp;</p>

Shákirtaqynyń mólsheri 3 myńnan 20 myń teńgege deıin. Ony 2-11 synyptyń oqý ozattary ala alady. Bastamanyń avtory osy mekteptiń túlegi, qaladaǵy belgili metsenattardyń biri.

«Oqýshylarǵa shákirtaqy 2017 jyldan beri berilip keledi. Nátıjesi keremet. Balalar sabaqqa den qoıyp, únemi joǵary kórsetkishterge umtylady. Birinshi jyly 69 oqý ozaty bolsa, bıyl shákirtaqy alatyndardyń sany 102-ge jetti. Toqsannyń qorytyndysy boıynsha bul san ózgerýi múmkin. Oqýǵa degen ynta artqannan keıin túrli baıqaýlarda da jetistigimiz joǵary. Máselen byltyr 49 oqýshy halyqaralyq, al 56-sy respýblıkalyq olımpıadalar men baıqaýlarda júldeger atandy», - deıdi Petropavldaǵy № 43 orta mektep dırektorynyń tárbıe isi jónindegi orynbasary Galına Qusaıynova.

Foto: Petropavldaǵy №43 orta mektepten

Tólenetin stıpendııa somasy balalardyń jas ereksheligine baılanysty, qazirgi ýaqytta ekinshi synyp oqýshysyna 3 myń teńge berilse, joǵary synyp oqýshylarynyń shákirtaqysy 20 myń teńge. Jalpy shákirtaqy qory 900 myń teńge.

«Bir úıden eki bala alatyndar bar. Shákirtaqy alý úshin aýysyp kelgen ozat oqýshylar da boldy. Aıdyń sońynda biz bala sanyn aıtamyz, kásipker qarjyny aýdarady, ony tizim boıynsha oqýshylardyń ata-analaryna beremiz», - deıdi Galına Qusaıynova.

Ótken oqý jylynyń túlekteriniń UBT-da ortasha baly – 78,4 bolǵan. 18 bala joǵary oqý ornyna oqýǵa tússe, sonyń 14-i qazirgi ýaqytta grantqa oqyp jatyr.