Petropavldaǵy «Qarasaı» stadıony ÝEFA talaptaryna saı jańǵyrtylyp jatyr

<p>PETROPAVL. KAZINFORM &ndash; Petropavldaǵy &laquo;Qarasaı&raquo; stadıonynda jóndeýdiń ekinshi kezeńi bastaldy. Jańǵyrtýdan ótken nysanda keıin eýrokýbok oıyndaryn ótkizýge múmkindik týmaq.</p>

Soltústik Qazaqstan oblysynyń ákimi Ǵaýez Nurmuhambetov «Qarasaı» stadıonynda atqarylyp jatqan jumystyń barysyn kórdi. Sport nysanyn jańǵyrtý byltyr bastalyp, jylytý jáne sýarý júıesi bar jasandy alań, jańa jaryqtandyrý júıesi, elektrondy tablo jáne dybys qondyrǵysy ornatyldy. Osy maqsatqa 1,3 mlrd teńge bólindi. 

Foto: SQO ákimdigi

Bıyl, jospar boıynsha, batys jáne shyǵys trıbýnalar jóndelip, trıbýna astyndaǵy ǵımarat, kıim aýystyratyn jáne sanıtarlyq bólmeler jańartylady. Batys trıbýnanyń ústine jańbyrdan qorǵaıtyn shatyr ornatylady. Sonymen qatar, komandalar ortadan shyǵatyn bolady. 

Sondaı-aq, oryndyqtar jáne tartan jabyny bar júgirý jolaǵy aýystyrylady. Shyǵys trıbýnada BAQ ókilderine arnalǵan oryndar paıda bolyp, ákimshilik ǵımarat salynady. Avtoturaq pen stadıon aýmaǵyn abattandyrý da nazardan tys qalmaıdy.

Foto: SQO ákimdigi

«Qaıta jóndeýden keıin «Qarasaı» stadıony ÝEFA talaptaryna saı bolyp, Petropavlda eýrokýbok oıyndaryn ótkizýge múmkindik beredi. Fýtbolshylar men jankúıerler úshin qolaıly jaǵdaı jasalady. Jalpy, bul jumystyń nátıjesinde óńirimizde fýtbol keńinen nasıhattalyp, damýdyń jańa deńgeıine shyqpaq», - dep jazdy óńir basshysy áleýmettik jelidegi paraqshasynda. 

Buǵan deıin SQO boıynsha qylmystyq atqarý júıesi departamentiniń bastyǵy para alyp ustalǵandyǵyn jazǵan edik.