Petropavldaǵy balabaqshalardyń biriniń qyzmetkerinen týberkýlez anyqtaldy
«Baldáýren» balabaqshasynda týberkýlezge qarsy dezınfektsııanyń júrgizilgendigi jaıynda tárbıeshiler ata-analardy eskertip, ortaq chatqa jazǵan. Balalardy erterek áketýdi suraǵan. Bul - tárbıelenýshilerdiń áke-shesheleriniń narazylyǵyn týǵyzdy.
- Bizdi erterek eskertse, dezınfektsııa jasalatyndyǵyn aıtsa balany alyp ketemiz ǵoı. Bul jumysty keshke, balalar ketkesin de júrgizýge bolady nemese demalys kúni. Balalar uıyqtap jatqan kezde olar bakterııany óltirý úshin arnaıy zattardy sepken. Sanıtarııalyq dárigerlerge habarlasyp bildim, aǵzaǵa túsken ýly zat qazir bilinbese de, keıin saldary bolýy múmkin.
Ekinshiden, aýyrǵan adam – balabaqshanyń medıtsınalyq qyzmetkeri. Ol bizdiń balalarmen kúnde baılanysta bolǵan. Qalaı buǵan jol bergen, - deıdi Petropavl turǵyny Ásel Ábýtálipova.
Soltústik Qazaqstan oblystyq bilim basqarmasynyń málimetinshe, Petropavldaǵy «Baldáýren» balabaqshasynyń qyzmetkerinde týberkýlez aýrýynyń anyqtalǵany týraly aqparat kelip tústi. Osyǵan baılanysty qyzmettik tergeý júrgizý úshin quramyna densaýlyq saqtaý jáne bilim berý qyzmetkerleri kiretin jumys komıssııasy quryldy.
- Aldyn ala málimetter boıynsha, osy jaǵdaı jyl saıynǵy profılaktıkalyq tekserý aıasynda anyqtaldy. Qazirgi ýaqytta bul qyzmetker ýaqytsha eńbekke jaramsyzdyq paraǵy negizinde jumystan bosatyldy.
SQO boıynsha dezınfektsııa ortalyǵynyń qyzmetkerleri barlyq úı-jaılardy dezınfektsııalady. Óńdeý eki kezeńde júrgizildi: «Tynyǵý ýaqyty» kezinde basseın, oıyn bólmeleri, dálizder óńdeldi, saǵat 19.00-den keıin balabaqshanyń barlyq basqa bólmeleri dezınfektsııalandy.
Dúısenbiden bastap barlyq qyzmetkerlerdi tekseristen ótkizedi. Baılanysta bolǵan balalarǵa Mantý synamasy qoıylady, - delingen resmı jaýapta.