Petropavlda jylý-elektr ortalyǵynda apat bolyp, birneshe qazandyq isten shyqty

PETROPAVL. QazAqparat – Petropavlda demalys kúnderi ekinshi jylý-elektr ortalyǵynda birneshe qazandyq isten shyǵyp, energetıkter jylý berý qýatyn azaıtýǵa májbúr boldy, dep habarlaıdy QazAqparat tilshisi.

Soltústik Qazaqstan oblysy ákimdigi baspasóz qyzmetiniń málimetinshe, Petropavldaǵy jylý-elektr ortalyǵynda 25 jeltoqsan kúni saǵat 10.40 mınýt ketkende eki qazandyq isten shyqqan.

Búgin tańerteńgi jaǵdaı boıynsha, kásiporyndaǵy 12 qazandyqtyń altaýy jumys istep tur.

Bireýi qalpyna keltirilip jatsa, úsheýi jóndelýde, rezervte turǵan taǵy eki qazandyqty saǵat 14.00-de iske qosýǵa daıyndap jatyr.

Oblys jylý jáne elektr qýatynan ajyratylǵan joq.

Buǵan deıin «Sevkazenergo» AQ Petropavldaǵy ekinshi jylý-elektr ortalyǵynda apat bolǵandyǵy jaıynda eskertip, páterlerde jylýdyń azaıýy múmkin ekendigin aıtqan edi.

Qazandyqtar eskirgendikten qysymǵa shydamaı, tesilgen. Apattan kásiporynnyń bir jumysshysy kúıik alyp, aýyr halde aýrýhanaǵa tústi.

«27 jastaǵy er adamnyń denesiniń 40 %-y kúıgen. Beti, moıyny, qoldary, beli men aıaqtary ystyq býǵa kúıip qalǵan. Bizge túsken kezde ony travmatolog, terapevt, anestezıolog-reanımatolog qarady. Birden jansaqtaý bólimshesine jatqyzý týraly sheshim qabyldandy. Qazir syrqat qarqyndy terapııadan ótip jatyr. Esin biledi, ózdiginen demalýda. Jaǵdaıy týraly aıtýǵa ruqsat berdi, tıisti em-domdy alyp jatyr», - deıdi Petropavl qalalyq kóp salaly aýrýhananyń bas dárigeri Janna Maýytova.

Petropavl 2-JEO-da bıyldyqqa tirkelgen bul - osymen ekinshi apat.

Qarasha aıynyń basynda kásiporynnyń birneshe qazandyǵy isten shyǵyp, 50 myńǵa jýyq turǵyn elektr jaryǵynsyz qalǵan edi.