Petropavlda jyl sońyna deıin jeke sektordan 237 úı súriledi

PETROPAVL. QazAqparat – Petropavlda jyl sońyna deıin jeke sektordan 237 turǵyn úı syrylyp, kóp qabatty baspana qurylysyna 11,8 ga jer bosatylmaq, dep habarlaıdy QazAqparat tilshisi.

Soltústik Qazaqstan oblysyn 2025 jylǵa deıin keshendi damytý josparyna sáıkes 2,3 mln sharshy metr turǵyn úı paıdalanýǵa berilýi tıis.

Jyl saıyn osy maqsatqa 12 mlrd teńge bólinip otyrady. Qazirgi ýaqytta óńirde 53 kóp qabatty úıdiń qurylysy júrip jatyr.

Onyń ishinde kommýnaldyq-jalǵa, nesıege beriletin úıler de, kommertsııalyq baspanalar da bar. Sonyń ishinde aýdan ortalyqtarynda da turǵyzylyp jatyr.

«Máselen Ǵ.Músirepov atyndaǵy aýdannyń ortalyǵy Novoıshımkada 50 páterlik nesıelik úı salynyp bitýge jaqyn. Jalpy jyl sońyna deıin 1583 páteri bar osyndaı 15 baspana paıdalanýǵa berilmek. Páterler «Otbasy bank» biryńǵaı operator arqyly jergilikti atqarýshy organda kezekte turǵandarǵa memlekettik turǵyn úı baǵdarlamalary boıynsha usynylady», - deıdi SQO ákiminiń orynbasary Sátjan Ablalıev.

Budan basqa jeke ınvestorlardyń esebinen 1367 páterlik 23 úı turǵyzylyp jatyr. Olardyń 8-i bıyl paıdalanýǵa berilmekshi. 600 páterlik 9 kommertsııalyq úıdiń jobasy jasalyp jatyr.

«Petropavlda «Jańa qala» renovatsııalyq baǵdarlamasy júzege asyp jatyr. 2017 jyldan bastap oblys ortalyǵynda eski jáne apatty jaǵdaıda turǵyn 1673 úı syryldy. Nátıjesinde 4800-ge jýyq adam turmystyq jaǵdaıyn jaqsartty. Jyl sońyna deıin 11,8 ga jerde ornalasqan 237 jeke turǵyn úı buzylmaq. Jalpy bıyl 463 úı buzylyp, 421 adam turǵyn úı jaǵdaıyn jaqsartty. Olarǵa kóppáterli úılerden baspana berildi», - deıdi Sátjan Ablalıev.