Petropavlda jumyrtqa festıvali ótedi
Mereke 6 qazanǵa josparlanǵan. «SKOrlýpıno» dep atalǵan aımaqtyq festıval alǵash ret uıymdastyrylyp otyr. Ol Petropavldaǵy Táýelsizdik stellasy mańyndaǵy alańda ótedi.
Uıymdastyrýshylardyń aıtýynsha, festıvaldi ótkizýdegi basty maqsat – óńirge týrısterdi kóptep tartý. Bul – halyqaralyq tájirıbe. Máselen, Germanııada «syra» merekesi bar, Ispanııa «záıtún maıy» festıvalin ótkizse, Italııadaǵy «Shokolad» merekesi myńdaǵan týrısti jınaıdy eken.
SQO-da da sońǵy jyldary osyndaı festıvalder kóptep uıymdastyrylyp jatyr. Solardyń biri – «Móńke kúni».
«Móńke kúni» bıyl tórtinshi ret ótti. SQO kólge baı óńir. Shamamen 3 myńnan artyq sý qoımasy bar. Onyń 90%-da móńke balyǵy kezdesedi. Osy baılyǵymyzdy jarnamalaý maqsatynda qolǵa alyndy. Budan basqa «QymyzFEST» merekesin uıymdastyryp kelemiz. Óıtkeni jylqynyń alǵash ret Qyzyljar óńirinde qolǵa úıretilgendigin ǵalymdar dáleldedi. Mundaı merekeler ádette tarıhı oqıǵalarmen nemese óńirdiń áleýetine, sondaı-aq jergilikti turǵyndar arasynda asa tanymal ónimge qatysty uıymdastyrylady», - deıdi SQO Kásipkerlik jáne týrızm basqarmasynyń basshysy Quralaı Jarova.
Bul kúni oblystaǵy qus fabrıkalary óz ónimderin jármeńkege shyǵarmaq. Ónimder bazar baǵasymen saýdalanady.
«Mereke kúndizgi 12.00-de bastalady. Qala turǵyndary men qonaqtaryna aýqymdy baǵdarlama uıymdastyrmaqpyz. Qus fabrıkalary óz ónimderin saýdaǵa shyǵarady, budan basqa jergilikti sheberlerdiń jármeńke-kórmesi jáne gastronomııalyq jármeńke ótedi. Qalanyń úzdik 10 aspazy jumyrtqadan pisiriletin taǵamdardy ázirlep, qonaqtarǵa tegin dám tatyrady. Sondaı-aq utylyssyz lotereıa oınatylyp, túrli baıqaýlar ótedi», - deıdi festıvaldi uıymdastyrýshy, «Qyzyljar jastary» agenttigi dırektorynyń orynbasary Alena Tretıakova.
SQO-da búginde bes iri qus fabrıkasy jumys isteıdi. Jylyna 800 mln dana jumyrtqa shyǵarady. Osylaısha jumyrtqa óndirýden respýblıka boıynsha úshinshi orynda keledi.