Petropavlda júkti áıel men qursaqtaǵy balasyn aman alyp qalý úshin 4 saǵat ota jasaldy

PETROPAVL. QazAqparat – Petropavlda perınataldyq ortalyq dárigerleri júktilik barysynda dert asqynǵan áıelge tórt saǵat ota jasap, ózin de, qursaqtaǵy balasyn da aman alyp qaldy, dep habarlaıdy QazAqparat tilshisi.

Soltústik Qazaqstan oblystyq kópbeıindi aýrýhana perınataldyq ortalyǵynyń málimetinshe, júkti kelinshektiń epıgastrııa aýmaǵy, ıaǵnı kindik tusynyń joǵary jaǵy burap aýyryp, dárigerlerge júgingen.

Qymbat ýaqytty ótkizip almaý úshin mamandar birden ota jasaýǵa sheshim shyǵarady.

«Kóp jaǵdaıda júkti áıelderde aýrý belgileri anyq baıqalmaıdy. Sondyqtan jedel ota jasalmasa naýqas ólip ketýi múmkin. Sol sebepti júktiligi 27 apta bolatyn kelinshekti kesar tiligi arqyly bosandyryp alyp, operatsııa jasaýǵa sheshim qabyldandy. Naýqasta soqyrishek bolǵan, ol asqynyp ketken», - deıdi mamandar.

Dárigerler 4 saǵat boıy ota jasap, áıel men onyń sábıin aman alyp qalýǵa tyrysty.

Nátıjesinde 1200 gr shaqalaq ómirge kelip, jedel túrde jańa týǵan sábıler reanımatsııasyna jatqyzyldy.

Mamandardyń aıtýynsha, kesar tiliginen basqa appendektomııa, ıaǵnı soqyrishekti alyp tastaý otasy jasalyp, ish qurylysy jýyldy.

Kúrdeli ota bolǵanyna qaramastan, áıeldiń ómirge bala ákelý múshelerine zaqym kelgen joq.

Qazirgi ýaqytta áıeldiń ómirine keler qaýip joq, jaǵdaıy jaqsy, bosanǵannan keıingi bólimnen shyǵarylyp, sábıiniń qasyna, jańa týǵan balalar patologııasy bólimine aýystyryldy.

Bul - onyń ekinshi balasy eken.

Foto: SQO perınataldy ortalyǵy