Petropavlda jigit montajdyq kóbikpen qaptalǵan avtokólikpen kóshede júrgen

<p>Petropavlda 21 jastaǵy jigit 15 táýlikke qamalýy múmkin. Ol qala kóshelerinde tolyq montajdyq kóbik jaǵylǵan kólikpen júrgen, dep habarlaıdy Kazinform.&nbsp;</p>

Áleýmettik jelide Petropavl kóshelerinde tolyqtaı montajdyq kóbikpen qaptalǵan kóliktiń júıtkip júrgen beınejazbasy tarady. Vıdeodan kólikke kóbiktiń tutas quıylǵanyn kórýge bolady, tek júrgizýshige joldy kórý úshin kishkene sańylaý jasalǵan. Buzaqyny polıtseıler alysqa uzatpaı ustady. 

 

Soltústik Qazaqstan oblystyq polıtsııa departamenti baspasóz qyzmetiniń málimetinshe, syrtyna montajdyq kóbik jaǵylǵan jáne memlekettik tirkeý nómirlik belgileri kórinbegen VAZ 21063 avtomashınasyn júrgizý faktisi boıynsha patrýldik polıtsııa batalonynyń qyzmetkerleri SQO-nyń 21 jastaǵy turǵynyn jedel anyqtap, ustady. 

«Jolda júrý qaǵıdalaryn buzǵany úshin QR Ákimshilik quqyq buzýshylyq týraly kodeksiniń 602-babynyń 1-bóligi, 590-babynyń 2 jáne 10-bólikteri, 620-baby boıynsha materıaldar jınaldy. Sondaı-aq QR ÁQBtK 434-babynyń 1-bóligi «Usaq buzaqylyq» boıynsha hattama toltyryldy, materıaldar protsestik sheshim qabyldaý úshin sotqa jiberiledi. Bul baptyń sanktsııasyna sáıkes 20 AEK mólsherinde aıyppul nemese 5 táýlikten 15 táýlikke deıingi merzimge ákimshilik qamaqqa alý kózdelgen», - delingen baspasóz qyzmetiniń habarlamasynda.