Petropavlda jeti jasar qyz aloeden kosmetıka jasap shyǵardy

<p>PETROPAVL. KAZINFORM &ndash; Petropavl turǵyny, mekteptiń 2-synyp oqýshysy Aısana Jolamanova aloeden teri kútimine arnalǵan jeti túrli ónim jasap shyǵardy.</p>

Aısana jasap shyǵarǵan kosmetıka qolda bar ónimderden jasalǵan. Máselen, betke arnalǵan maska jasaý úshin kosmetıkalyq saz, aloe jáne lımon shyrynyn qoldanǵan. Qazir ónimderiniń ishinde úsh túrli maska, sabyn, skrab jáne vannada sýǵa túsýge arnalǵan qospalar bar. 

- Anam qoldanady, betti tazartady, ylǵaldandyrady jáne betti emdeıdi dep aıtty. Eseıgende kosmetolog bolǵym keledi, - deıdi búldirshin.

Aısana Jolamanova Maǵjan Jumabaev atyndaǵy ІT-mektep-lıtseıde oqıdy. Ustazy Svetlana Isqaqovanyń sózinshe, úzdik oqýshylarynyń biri. 

Foto: Svetlana Isqaqova

- «Aloe jáne onyń emdik qasıeti» taqyrybyndaǵy jobany osy jyldyń basynda qolǵa aldyq. Aısanadan ózin qandaı taqyryp qyzyqtyratyn suraǵanda, anasy bet kútimine kóp kóńil bóledi jáne qymbat kosmetıka ónimderin qoldanatynyn aıtty. Ol qolda bar materıaldardan anasyna kosmetıka ónimin jasaýdy armandaǵan. Aqyldasa kele, osy taqyrypty aldyq. Bul jobamen respýblıkalyq «Zerde» zertteýshiler saıysynyń qalalyq kezeńine qatysyp, júldeli 2-oryndy ıelendi, - deıdi pedagog-zertteýshi Svetlana Isqaqova.

Búldirshinge armanyn júzege asyrýǵa ustazynan bólek, anasy da kómektesken.

- Aısananyń jasy áli jetide ǵana bolǵan soń oǵan, árıne eresekterdiń kómegi, baǵyt-baǵdary qajet. Ónimderdi jasamas buryn saýalnama júrgizdik. Sol saýalnama nátıjesin saralaı otyryp, osy kosmetıkalyq ónimder paıda boldy. Saýalnamaǵa qatysqandar aloe ósimdiginiń paıdasy kóp ekenin bilgenimen, is júzinde ony qoldana almaıtyn bolyp shyqty. Kosmetolog mamandarmen de osy aloeniń paıdasy týraly, teri túrleri jáne onyń erekshelikteri týraly aqyl-keńes aldy. Jasaǵan ónimderiniń tıimdiligi bar dep oılaımyn. Sebebi Aısana ónimderin qazir týystary, tanystary qoldanady, - deıdi ustaz.

Aısana kosmetologııalyq ónimderdiń jasalý joly, paıdasy týraly óz Telegram kanalynda aıtady.  

Foto: Svetlana Isqaqova

- Óńirge issaparmen kelgen QR Premer-Mınıstriniń orynbasary Tamara Dúısenova bizdiń mekteptiń jumysyn kórdi, sol kezde Aısana óz ónimi týraly qysqasha tanystyryp, syıǵa tartty. Jalpy alda osy jobany odan ári jalǵastyrýdy josparlap otyrmyz. Jasandy ıntellektti de qoldanǵymyz keledi. Telegram kanaldy damytý mindeti tur jáne de osy ónimderdi aprobatsııadan ótkizip, lıtsenzııa alýdy maqsat ettik, - deıdi Svetlana Isqaqova.

Buǵan deıin Petropavl mektepterine jasandy ıntellekt júıesi bar beınekameralar qoıylyp jatqanyn jazǵan edik.