Petropavlda jer kezegin kútkenderge 2 myń ýchaske berile bastaıdy

PETROPAVL. QazAqparat – Petropavldaǵy «Solnechnyı 2» kentinde jeke turǵyn úı salý úshin 10 sotyq jerge kezekke turǵandarǵa 1,5 myń jer ýchaskesi ázirlendi. Jalpy barlyǵy 2 myń ýchaske berilmek, dep habarlaıdy QazAqparat tilshisi.

Búgin Soltústik Qazaqstan oblysynyń ákimi Qumar Aqsaqalov Petropavldaǵy «Solnechnyı 2» kentinde boldy.

Bul aýdannan 10 sotyq jerge kezekke turǵandarǵa ýchaskeler úlestirilmek. Qazirgi ýaqytta jer telimderi berýge daıyn tur.

Qumar Aqsaqalov áleýmettik jelidegi paraqshasynda jaǵymdy jańalyqty bólisti.

«Solnechnyı 2» shaǵyn aýdanynda jeke turǵyn úı qurylysyna 1,5 myń tegin jer telimi daıyndaldy. Barlyǵy 2 myń jer ýchaskesi berilmek. Jer ýchaskelerine ınjenerlik ınfraqurylym tartylǵan: sý, elektr jáne jol bar. Shaǵyn aýdanda barlyǵy 105 km elektr jelisi, 54 qosalqy stansa, 72 km sý qubyry, 78 km jol salyndy. Yqsham aýdanda mektep te salynady», - dep jazdy oblys ákimi.

Qumar Aqsaqalovtyń aıtýynsha, Petropavldaǵy «ıÝjnyı» shaǵyn aýdanynda taǵy 1 myń jer telimi tegin beriledi. Qazir onda ınfraqurylymdyq jumystar aıaqtalýǵa jaqyn.

«Osylaısha, oblys ortalyǵynda qala turǵyndaryna jeke úı salý úshin 3 myń tegin jer telimi beriledi. Esterińizge sala keteıin, qazir Petropavlda 16,5 myń adam jeke turǵyn úı qurylysyn júrgizý úshin ýchaskege kezekte tur. Tegin jer telimderi kezek boıynsha beriledi. Bul protsess ashyq bolýy tıis. Ol úshin arnaıy komıssııa qurylyp, onyń quramyna qoǵam belsendileri, jýrnalıster, depýtattar men qoǵamdyq keńes ókilderi kiredi», - dedi óńir basshysy.