Petropavlda jekemenshik 300 úı súriledi
Qurylys, sáýlet jáne qala qurylysy basqaramasynyń alqa májilisinde SQO ákimi Qumar Aqsaqalov aldaǵy ýaqytta qalada 300 úı súriletinin aıtty.
«Bizde jeke sektor barshylyq, ıaǵnı 15 myńǵa tarta jeke turǵyn úı bar. Olardyń kóbisi eskirgen. Sondyqtan bul úılerdiń ornyna kópqabatty úıler salý kerek. 10-15 jeke turǵyn úıdiń ornyna 10 ese artyq páter salamyz. Ol jerde saýda, medıtsınalyq ári bilim berý mekemeleri ornalasady», - dedi Aqsaqalov.
Osy oraıda ol eski úılerdi súrip tastaý sheshimderin qabyldaý sharalary ashyq júrgizilýi kerektigin atap ótti.
«Sybaılas jemqorlyqqa qarsy kúres qyzmetimen, qoǵamdastyq ókilderimen, depýtattarmen birlese árbir úı men nysandy alqaly jıynda qarastyrý kerek. Bul máseleni jeke kabınette, májilisten tysqary talqylaýǵa jol bermeý kerek», - dedi oblys ákimi.