Petropavlda jataqhanadan órt shyǵyp, turǵyndardyń birin kúıik shaldy
Soltústik Qazaqstan oblysy tótenshe jaǵdaılar departamenti baspasóz qyzmetiniń málimetinshe, Petropavldaǵy Pýshkın kóshesi, 43 mekenjaıda ornalasqan jataqhanada órt shyqty.
Oqıǵa ornyna órt sóndirý qyzmetiniń 3 avtotsısternasy jáne 3 arnaıy kóligi men jeke quramnan 21 adam jetti. Olar birden iske kirisip, órt shyqqan ǵımarattan turǵyndardy shyǵardy.
«Órt jataqhananyń ekinshi qabatyndaǵy bólmelerdiń birinen shyqqan eken. Onyń ıesi áıel biz kelgende dalada júrdi. Nysan tútinge oranǵandyqtan, turǵyndardy qutqarýǵa týra keldi. Demalý apparattary men qabyn qoldanyp 5 adamdy alyp shyqtyq. Sondaı-aq taǵy 25 adam qaýipsiz jerge shyǵaryldy. Jergilikti atqarýshy organdar oqıǵa ornyna avtobýstardy aldyrtty. Úıden shyǵarylǵandardy qatty aıazda tońyp qalmaýy úshin birden osy kólikterge otyrǵyzdyq», - deıdi Petropavl qalalyq № 1 órt sóndirý bóliminiń bastyǵy Bolat Jumajanov.
Órt tolyǵymen sóndirildi. Órttiń shyǵý sebebi men kelgen shyǵyn mólsheri anyqtalatyn bolady.
Al bólmeniń ıesi - áıeldi kúıik shalǵan eken. Ol emdeý mekemesine jetkizildi.