Petropavlda jarty tonnaǵa jýyq esirtki joıyldy

PETROPAVL. QazAqparat – Petropavlda polıtseıler esirtkiniń iri partııasyn – jarty tonnaǵa jýyq marıhýanany peshke jaqty. Bul –bıyldyqqa esirtki joıýdyń besinshi aktsııasy, dep habarlaıdy QazAqparat tilshisi.

Soltústik Qazaqstan oblysynda polıtseıler jedel-izdestirý is-sharalary barysynda asa iri mólsherdegi marıhýana partııasyn tárkilegen edi. «Petropavl - Astana» avtojolynda tártip saqshylary «Volkswagen Passat» avtokóligin toqtatyp, júksalǵyshtan 128 kg marıhýana tabyldy. Keıin tintý sharalary barysynda ustalǵandardyń biriniń garajynan 300 kg marıhýana men 21 kg 300 gr gashısh jasyrylǵan oryn anyqtaldy. Bul sońǵy 10 jylda oblys polıtseıleri tárkilegen eń iri marıhýana partııasy.

Búgin vedomstvo baspasóz qyzmetiniń málimetinshe, osy zańsyz aınalymnan alynǵan 460 kg esirtki – marıhýana men gashısh joıyldy. Tártip saqshylary mundaı rásimdi komıssııa men jurtshylyq ókilderiniń qatysýymen júrgizedi. Aktsııaǵa jastar resýrstyq ortalyǵynyń eriktileri shaqyryldy.

«Eriktiler – polıtseılerdiń senimdi kómekshileri. Bıyl olar esirtkige qarsy baǵyttaǵy otyz is-sharaǵa qatysty. Esirtkini joıý rásimine qatysý eritiler úshin polıtsııa men qoǵamnyń ózara is-qımyl tıimdiliginiń aıqyn dáleli», - deıdi SQO PD esirtki qylmysyna qarsy is-qımyl basqarmasynyń bastyǵy Ivan Terzıdı.

Bul SQO-da bıyldyqqa esirtkini joıýdyń besinshi is-sharasy. Jalpy tártip saqshylary jyl basynan zańsyz aınalymnan 500 kg astam túrli esirtkini tárkilegen.