Petropavlda jańajyldyq bezendirýge bir tıyn bıýdjet qarajaty jumsalmady

PETROPAVL. QazAqparat – Petropavlda bıyl jańa jyl merekesine oraı úsh negizgi shyrsha bezendirildi. Olardy ornatýǵa, jalpy muz qalashyqtaryn salýǵa bıýdjet qarajaty jumsalǵan joq, dep habarlaıdy QazAqparat tilshisi.

Petropavl qalasy jańa jyl merekesine ásem bezendirildi. Keshe saltanatty túrde basty shyrshanyń shamy jaǵylyp, merekelik dýman ótti.

Jalpy bıyl oblys ortalyǵynda úsh negizgi shyrsha quryldy. Olar ortalyq alańda, Petropavl ákimdiginiń aldynda jáne Bereke yqsham aýdanynda ornalasqan.

Petropavl qalalyq ákimdiginiń málimetinshe, jańa jyl merekesine oraı shahardy bezendirýge, shyrshalardy quryp, muz qalashyqtaryn salýǵa bıyl qazynadan bir tıyn da jumsalǵan joq.

Máselen ortalyq shyrshany ornatyp, ásemdeýmen «Apattyq qyzmet» óndiristik kooperatıvi aınalysty. Onyń bıiktigi 30 metrge jetedi.

Al onyń mańyn jınap, abattandyrýmen «Kommýnhoz» JShS aınalysty. Muz qalashyǵyn salýǵa, ony jaryqpen bezendirýge kásipkerler demeýshilik jasady.

Byltyr qalany ásemdeýge qoldanylǵan jańa jyldyq oıynshyqtardy jónge keltirýge jergilikti kolledjder kómektesti.

Muz qalashyǵy Petropavldyń tórt aýdanynda – ortalyq alańda, qalalyq ákimdik aldyndaǵy alańda, Bereke jáne 20-shy yqsham aýdandarynda salynyp jatyr.

Petropavlda qurylmaly shyrsha bıyl tórtinshi ret qoldanylyp jatyr. Ótken jyly da qalany merekege oraı bezendirýge bıýdjetten qarjy bólingen joq.