Petropavlda jańa jyldyq bezendirýge qansha jumsalatyny aıtyldy

<p>PETROPAVL. KAZINFORM &mdash; Petropavlda bıyl 8 muz qalashyǵy salynady. Jańa jyl merekesine oraı kósheler de bezendirilmek.</p>

Soltústik Qazaqstan oblysy ishki saıasat basqarmasynyń málimetinshe, bıyl ótken jylǵa qaraǵanda muz qalashyqtarynyń sany bireýge artyq bolmaq. Meıramnyń sımvoly — 30 metrlik byltyrǵy shyrsha bas alańǵa ornatylady.

Budan bólek ortalyq alań, Pestroe kóliniń jany, Jeńis saıabaǵy, saparjaı, «Bereke» shaǵyn aýdany, N. Nazarbaev jáne G. Jýkov kósheleriniń qıylysy janyndaǵy alań bezendiriledi.

Olardyń qataryna kóktemgi sý tasqynynan zardap shekkender kóshirilgen jańa «Birlik» shaǵyn aýdany qosylǵan.

Mamandardyń aıtýynsha, qalany bezendirýde aıtarlyqtaı ózgeshelik bolmaıdy. Birer kún buryn qoldanysta bolǵan oıynshyqtardyń, shaǵyn sáýlet nysandarynyń bútindigi tekserildi. Olar muz qalashyqtaryn, oblys ortalyǵyn bezendirýge jaramdy dep tanyldy. 

Jańa jyl meıramyna oraı Petropavldy, aýdan ortalyqtaryn bezendirýge qatysty oblys ákimi Ǵaýez Nurmuhambetov te ortalyq kommýnıkatsııalyq qyzmette bolǵan brıfıngte aıtty.

— Oblys ortalyǵyn bezendirýge 13,5 mln teńge jumsalady. Aýdan ortalyqtarynda bul maqsatqa az qarajat bólinýi tıis. Bıylǵydaı kúzde jaqsy ónim alǵandyqtan, metsenattarymyz, sharýashylyqtardyń jetekshileri, bizdiń patrıottar kómektesedi dep oılaımyn, — dedi brıfıngte SQO ákimi Ǵaýez Nurmuhambetov.

Buǵan deıin SQO-da qaı jerde shańǵy-konkı tebýge bolatyndyǵyn jazǵan edik.