Petropavlda jańa oqý jylynda túzetý mektep-ınternaty esigin aıqara ashpaq

<p>PETROPAVL. KAZINFORM &ndash; Petropavlda múgedektigi bar balalarǵa arnalyp salynyp jatqan jańa mektep-ınternat qaladaǵy oryn jetispeýshiligi máselesin sheshpek.</p>

Arnaıy túzetý mektep-ınternaty Petropavldaǵy «Bereke» shaǵyn aýdanda ornalasqan. Merdiger kompanııa ókilderiniń sózine qaraǵanda, nysandy osy jyldyń tamyz aıynda paıdalanýǵa berý josparlanǵan.

Qurylys barysymen «AMANAT» partııasynyń Soltústik Qazaqstan oblystyq fılıaly partııalyq baqylaý komıssııasynyń músheleri tanysyp shyqty. 

Foto: «AMANAT» partııasy SQOF baspasóz qyzmeti

Jańa mektepti jergilikti «Zertteý SK» kompanııasy salyp jatyr. Qazir nysan 50% daıyn. Onda 100-ge jýyq jumysshy eńbek etedi. Qazirgi ýaqytta ǵımarattyń qasbetin ýaqytynda aıaqtaý erekshe nazarda tur.

«Búginde nysannyń qasbeti salynyp jatyr. Alaıda kesteden keshigip jatyrmyz. Buǵan deıin 4 brıgada jumys istedi. Qazir iske besinshisin qostyq. Jalpy 30-ǵa jýyq azamat eńbek etip jatyr. Sondaı-aq, ishki árleý jáne ınjenerlik jeliler boıynsha jumys júrgiziledi. Jaqynda órtke qarsy dabyl júıesi ornatylady», - dedi ýchaske bastyǵy Esengeldi Kókishev.

Іshki árleý jumystary aıaqtalǵannan keıin syrtqy jáne aýmaqty abattandyrý jumystary bastalady. Alaıda munymen basqa kompanııa aınalysady. Nysannyń jańa oqý jylyna daıyn bolýyn monıtorıngtik top qadaǵalamaq.

Foto: «AMANAT» partııasy SQOF baspasóz qyzmeti

Qazirgi ýaqytta Petropavldaǵy №2 arnaıy mektep-ınternaty 111 oqýshyǵa shaqtalǵan. Alaıda búgingi kúni oqý ordasynda 191 bala oqyp júr. Jańa mektep-ınternat bul máseleni sheshpek.

Jańa mekeme 300 oqýshyǵa shaqtalǵan, 50 oryndyq ınternaty bolady. Munda 39 oqý kabıneti, kitaphana, tar beıindi maman-dárigerlerge arnalǵan kabınetter, sportzal, oıyn, dýsh bólmeleri, kir jýatyn oryn, avtoturaq jáne t.b. bolady. Munyń bárine 2,4 mlrd teńge bólindi.