Petropavlda zańsyz paıdalanýǵa berilgen 300-den astam jer ýchaskesi anyqtaldy

PETROPAVL. QazAqparat – Petropavlda birneshe jyl paıdalanylmaı bos jatqan 316 jer ýchaskesi anyqtaldy. Sonyń 75-i sot arqyly memleket menshigine qaıtaryldy, dep habarlaıdy QazAqparat tilshisi.

Búgin Petropavl ákimi Bolat Jumabekov óńirlik kommýnıkatsııalar qyzmetinde brıfıng ótkizip, ótken jyldy qorytyndylady, bıylǵy jyldyń josparlarymen bólisti.

Atqarylǵan jumystardyń biri – Petropavl aýmaǵynda bos jatqan jerlerdi anyqtaý.

«Sońǵy úsh jyldyń ishinde 75 ýchaske qaıtaryldy. Jalpy tekserý barysynda zańsyz berilgen 316 ýchaske anyqtaldy. Budan basqa bos jatqan saıajaılardy anyqtaý maqsatynda da jumystar júrgizilip jatyr. Sońǵy jyldary turǵyndar tarapynan saıajaı ýchaskelerine suranys artqan. Bos jatqandary esepke alynady. Keıin ony ákimdik arqyly zańdy túrde paıdalanýǵa alýǵa bolady», - deıdi Bolat Jumabekov.

Jyl basynan bos jatqan 176 saıajaı ýchaskesi anyqtalǵan, olardyń 125-i ıesiz múlik retinde esepke alyndy.

Aýlalarǵa ruqsatsyz qoıylǵan garajdar da alynyp jatyr.

«Aýlalarda turǵan garajdar boıynsha turǵyndardan kóp ótinish túsedi.

Bizden olardy basqa jaqqa kóshirip, oryndy bosatýymyzdy suraıdy.

Aýlalardy jóndeý kezinde de bul máselege tap bolyp jatyrmyz. Qazir Petropavlda 1419 garaj zańsyz tur. Ieleriniń olardy qoıýǵa ruqsaty joq.

Byltyr olardyń 253-i buzylsa, bıyl 121-i basqa orynǵa kóshirildi.

Petropavldaǵy «Promyshlennaıa kóshesinde 600 garaj syıatyn oryn ázirledik», - deıdi Petropavl ákimi.